«Liberation»: Еўрапарламент прысудзіў прэмію Сахарава лідэру «джынсавай» рэвалюцыі :: Хартыя'97 :: Навiны

Учора Еўрапарламент прысудзіў штогадовую прэмію імя Андрэя Сахарава лідэру беларускай апазіцыі Аляксандру Мілінкевічу. Як адзначае Liberation, палітык сціпла прыняў вестку пра гэта. "Гэта шчасце і гонар для мяне. Але я не лічу гэта асабістай узнагародай. Гэтая прэмія прысуджаная тысячам людзей, якія паказалі, у прыватнасці у гэтую вясну, сваю адвагу і жаданне змагацца за свой гонар". А таксама дадаў, што патраціць прэмію на падтрымку суайчыннікаў, якія з`яўляюцца "ахвярамі палітычных рэпрэсій" у Беларусі.

Сваёй акуратнай бародкай, выявай летуценніка, Аляксандр Мілінкевіч больш паходзіць на выкладчыка, чым на народнага абаронцу. Адзіны кандыдат ад апазіцыі на прэзідэнцкіх выбарах увесну 2006 года, ён паказаў прыклад дзіўнай рашучасці, з`яўляючыся лідэрам апазіцыйнага руху. Так званая "джынсавая рэвалюцыя" (сакавік 2006 года), якая заявіла аб сабе як водгук на "памаранчовую рэвалюцыю" ва Ўкраіне і на "рэвалюцыю руж" у Грузіі, была падаўленая. Аднак заяўленай мэты – вызваліцца ад страха перад рэпрэсіямі, які не пакідае прыгнечанага жыхара, ёй дасягнуць атрымалася.

Пацярпеўшы паражэнне на выбарах, вынікі якіх Еўразвяз прызнаў сфабрыкаванымі, Аляксандр Мілінкевіч больш не верыць у магчымасць здымання з паста Лукашэнкі шляхам галасавання. Аднак ён лічыць, што яго можна перамагчы пасродкам мірнай рэвалюцыі. Гэта крок, які патрабуе па меншай меры двухгадовай працы. А яшчэ запатрабуецца нямала мужнасці.

Апазіцыянер у рашучым настроі, пры гэтым ён заяўляе, што беларусы "падняліся не для таго, каб аказацца пераможанымі".