Больш за тысячу сьведкаў гатовыя выступіць у абарону Дашкевіча :: Хартыя'97 :: Навiны

Актывісты “Маладога фронту” сабралі 1273 подпісы людзей, якія гатовыя сьведчыць у судзе ў абарону лідэра арганізацыі Зьміцера Дашкевіча, паведамляе “Радыё Свабода”. Многія з іх зьбіраюцца 30 кастрычніка прыйсьці да суду Кастрычніцкага раёну Менску, дзе пачнецца працэс над актывістам. Зьмітра Дашкевіча будуць судзіць паводле артыкулу 193, часткі 1 Крымінальнага кодэксу — стварэньне ці ўдзел у незарэгістраванай арганізацыі.

Цягам апошняга месяца сябры й паплечнікі Зьмітра зьвярталіся па дапамогу да амбасадаў краінаў Эўразьвязу ў Менску, у Эўракамісію і АБСЭ. Праводзілі вулічныя акцыі пратэсту.

У сьпісе абаронцаў Дашкевіча — лідэр дэмакратычных сіл Аляксандар Мілінкевіч, старшыня Аб’яднанай грамадзянскай партыі Анатоль Лябедзька, пісьменнік Уладзімер Аролоў ды іншыя. Яшчэ некалькі соцень маладафронтаўцаў, іхных бацькоў і знаёмых выкліканыя позвай у суд на 31 кастрычніка. Яны зьбіраюцца засьведчыць, што належаць да арганізацыі “Малады фронт” і будуць патрабаваць судзіць іх па тым жа артыкуле, што і Зьмітра Дашкевіча.

Маладафронтаўцы зьбіраюцца прыйсьці да суду са сьвечкамі й партрэтамі Зьмітра Дашкевіча. 29 кастрычніка яны зьбіраюцца правесьці акцыю ў абарону Зьмітра ў рамках шэсьця на Дзяды. 30 кастрычніка акцыі салідарнасьці з Дашкевічам плянуецца правесьці ў Польшчы, Літве і Ўкраіне.