Алена Захожая працягвае галадоўку ў шпіталі :: Хартыя'97 :: Навiны

Актывістка Беларускага незалежнага прафсаюзу Алена Захожая, якая знаходзіцца ў шпіталі, працягвае галадоўку. Аб гэтым БелаПАН паведаміў яе сын Яўгеній. Па яго словах, А.Захожая "вельмі слабая", але адмаўляецца спыніць галадоўку. "Яна патрабуе, каб усе кропельніцы рыхтаваліся пры ёй", – сказаў сын А.Захожай.

Па інфармацыі сына, 31 кастрычніка А.Захожая атрымала ліст з гарвыканкама. "Там гаворыцца, што адсутнічаюць дакументы аб наяўнасці юрыдычнага адрасу ў прафсаюза. Як толькі гэты адрас з`явіцца, пытанне аб перарэгістрацыі будзе разгледжанае, – распавёў Яўгеній. – Завод гэты адрас не падае. І завод, і гарвыканкам проста ходзяць па крузе".

Нагадаем, актывістка Беларускага незалежнага прафсаюза А.Захожая трымае галадоўку з 3 кастрычніка, яна пратэстуе супраць парушэння правоў сяброў БНП. Жанчына патрабуе зарэгістраваць першасную арганізацыю БНП у ААТ "Белшына", а таксама выплаціць сябрам незалежнага прафсаюза прэміі і даплаты на аздараўленне, якія ўжо атрымалі астатнія працаўнікі прадпрыемства. 19 кастрычніка да акцыі пратэсту А.Захожай далучыліся яшчэ некалькі сяброў БНП, аднак некалькі дзён таму яны спынілі галадоўку ў сувязі з тым, што адміністрацыя прадпрыемства часткова выканала іх патрабаванні, датычныя да выплат на аздараўленне. "Акрамя таго, генеральны дырэктар паабяцаў асабіста кантраляваць сітуацыю з прафсаюзам на прадпрыемстве. І мы дамовіліся, што юрысты нашага прафсаюза сумесна з юрыстамі прадпрыемства разбяруць сітуацыю з прэміямі па кожным чалавекі", – паведаміў БелаПАН адзін з удзельнікаў акцыіі Рыгор Спасюк. Аднак А.Захожая адмовілася спыняць галадоўку датуль, пакуль адміністрацыя не выканае ўсе патрабаванні сяброў БНП.

31 кастрычніка А.Захожая была дастаўленая ў шпіталь пасля таго, як страціла прытомнасць на працоўным месцы.