У супрацоўніцы прэс-службы Мілінкевіча канфіскаваная аргтэхніка :: Хартыя'97 :: Навiны

Падчас ператрусу ў кватэры маці супрацоўніцы прэс-службы лідэра дэмакратычных сіл Беларусі Аляксандра Мілінкевіча Юліі Коцкай былі канфіскаваныя аргтэхніка, некалькі відэакасет і 6 пачкаў чыстай паперы. Аб гэтым прэс-цэнтру Хартыі’97 паведаміў прэс-сакратар лідэра дэмакратычных сіл Павал Мажэйка. Пры гэтым Мажэйка не змог удакладніць, якая менавіта аргтэхніка была канфіскаваная ў кватэры Коцкай. Па яго словах, тэхніка была спакаваная ў скрынкі.

"Акрамя таго, стала вядома, што міліцыянты правялі ператрусы ў суседзяў Юліі Коцкай. Пакуль невядома, на якой падставе, але міліцыянтамі былі канфіскаваныя два сістэмных блока ад кампутараў", – паведаміў Павал Мажэйка.

Нагадаем, што ўчора гарадзенскія міліцыянты і людзі ў цывільным правялі ператрус у кватэры, дзе прапісаная супрацоўніца прэс-службы лідэра дэмакратычных сіл Аляксандра Мілінкевіча Юлія Коцкая. У кватэры журналісткі нічога знойдзена не было, і тады супрацоўнікі міліцыі паспрабавалі патрапіць ў хату маці Юліі Коцкай.

Галіна Коцкая адмовілася адкрыць дзверы, бо міліцыянты прад`явілі ордэр на ператрус кватэры Юліі Коцкай, а дзяўчына нават не прапісаная ў хаце маці. У адказ міліцыянты ўзламалі дзверы хаты.

Па інфармацыі прэс-службы Мілінкевіча, міліцыянты прад`явілі ордэр, падпісаны следчым, які вядзе справу аб выбухах, што прагрымелі у Віцебску 14 і 22 верасня 2005 года.