Законапраект аб сацапытаннях разгледзяць у снежні :: Хартыя'97 :: Навiны

"Палатачнікі" актывізавалі працу над законапраектам "Аб апытаннях грамадскай думкі". Яго плануецца разглядзець у Авальнай зале падчас бягучай сесіі ў снежні. Аб гэтым заявіў старшыня Пастаяннай камісіі "палаты прадстаўнікоў" па правах чалавека, нацыянальных адносінаў і сродках масавай інфармацыі Юрый Кулакоўскі сёння на сустрэчы з кіраўніком Офіса АБСЕ у Менску Оке Петэрсанам.

Оке Петэрсан прапанаваў "палатачнікам" шчыльнае супрацоўніцтва ў пытаннях падрыхтоўкі дадзенага законапраекта, з тым каб у дакуменце былі ўлічаныя міжнародныя нормы і прынцыпы.

Як растлумачыў Юрый Кулакоўскі, "у законапраекце будзе абумоўленая адказнасць арганізацый, якія праводзяць апытанні грамадскай думкі, у выпадку падавання імі ілжывай інфармацыі, падтасоўкі звестак". У законапраекце прапаноўваецца ўрэгуляваць парадак правядзення апытанняў і апублікавання (распаўсюджвання) вынікаў такіх даследаванняў у сродках масавай інфармацыі. Нарматыўны акт таксама вызначае статус Камісіі па апытаннях грамадскай думкі пры Нацыянальнай акадэміі навук Беларусі, патрабаванні да арганізацый, якія прэтэндуюць на правядзенне апытанняў, умовы іх акрэдытацыі.

Чыннікі з`яўлення, асаблівасці і магчымыя наступствы гэтага закона пракаментаваў доктар сацыялагічных навук, прафесар Алег Манаеў:

"З`яўленне праекту гэтага закона з`яўляецца, верагодна, заключным акордам дзеянняў беларускіх улад, якія фактычна ўсталёўваюць поўны кантроль над грамадскай думкай у нашай краіне. Улады сур`езна заклапочаныя тым, што, нягледзячы на амаль татальны кантроль над сродкамі масавай інфармацыі, культурай і адукацыяй, у грамадства застаецца магчымасць фармаваць уласнае меркаванне аб тым, што адбываецца ў краіне, а галоўнае – адкрыта выяўляць гэтае меркаванне. Самым важным механізмам гэтага з`яўляюцца незалежныя (якія не кантралююцца) органамі дзяржаўнай улады, сацыялагічныя цэнтры і СМІ. Незалежныя сацыёлагі праводзяць апытанні грамадскай думкі і пазнаюць, што ў рэчаіснасці думаюць людзі аб найважных падзеях і праблемах, абагульняюць і аналізуюць вынікі апытанняў, а незалежныя СМІ іх шырока публікуюць", – заявіў прафесар Манаеў.