Арыштаваны ўдзельнік акцыі ў падтрымку Дашкевіча :: Хартыя'97 :: Навiны

Моладзевы актывіст Зміцер Хведарук прысуджанны сёння судом Цэнтральнага раёна Менска да 3 сутак арышту за ўдзел у акцыі ў падтрымку лідэра "Маладога Фронту" Зміцера Дашкевіча. Прысуд вынес суддзя Аляксей Бычко. Зміцера Хведарука прызналі вінаватым у парушэнні артыкула 156 Кодэкса аб адміністрацыйных правапарушэннях – "дробнае хуліганства". Супрацоўнікі АМАПа заявілі ў судзе, што моладзевы актывіст нібы нецэнзурна выяўлаўся на плошчы. "Гэта хлусня, – паведаміў прэс-цэнтру Хартыі’97 па тэлефоне Зміцер Хведарук перад судовым паседжаннем. – Амапаўцы схапілі нас праз некалькі хвілін пасля таго, як мы выйшлі на плошчу. У аўтобусе яны збівалі нас нагамі, дзяўчын білі па твары, абражалі і пагражалі адвезці ў Курапаты".

Учора людзі выйшлі на Кастрычніцкую плошчу з партрэтамі лідэра "Маладога Фронту", які ў сераду атрымаў 1,5 гады пазбаўлення волі за "дзейнасць ад імя незарэгістраванай арганізацыі". Праз некалькі хвілін усе ўдзельнікі былі затрыманыя супрацоўнікамі АМАПа і дастаўленыя ў УУС Цэнтральнага раёна. Пасля вызначэння асобы былі вызваленыя 10 з 12 маладых людзей. Моладзевыя актывісты Зміцер Хведарук і Глеб Сандрас былі асуджаныя.

Глеб Сандрас быў сёння аштрафаваны па гэтым жа артыкуле на дзве базавыя велічыні – 62 тысячы беларускіх рублёў.