Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Працягваецца ціск на студэнтаў БДУ 12:21, 02/11/2006
На фізіка-матэматычны факультэт Беларускага дзяржаўнага універсітэту патэлефанавалі супрацоўнікі КДБ з патрабаваньнем “прыняць меры ўзьдзеяньня” на студэнта, сябра “Моладзі БНФ” Сяргея Карповіча, які штомесяц прымае ўдзел у акцыях салідарнасьці й аднойчы быў затрыманы.
27 кастрычніка супрацоўнікі КДБ прыйшлі на факультэт і, выклікаўшы Сяргея, пачалі размову пра “апазыцыю”. Супрацоўнікаў цікавіла акцыі салідарнасьці, якія праходзяць штомесяц 16 дня. У Сяргея распытваліся, хто вывесіў 16 кастрычніка расьцяжку на мосьце каля Траецкага прадмесьця ў Менску, якую ролю Сяргей адыгрывае ў арганізацыі “Моладзь БНФ”, якія акцыі ладзяцца моладзьдзю БНФ, ці мае Партыя БНФ дачыненьні да флэш-мобаў. Супрацоўнікі КДБ узялі нумар мабільнага тэлефону Сяргея для “атрыманьня ад яго новай інфармацыі”.
Старшыня моладзі БНФ, юрыст Алесь Каліта пракамэнтаваў сытуацыю наступным чынам: "Пасьля кожнай спробы ўціску на нашых актывістаў адпаведным спэцаддзелам моладзі складаюцца фотаробаты камітэтчыкаў, каторыя на нас ціснуць. Гэтыя фотаробаты надзейна захоўваюцца й у будучыні будуць выкарыстоўвацца для правядзеньня адпаведных сьледчых дзеяньняў ".
