Сёньня ў Беларусі адзначаюцца Дзяды -- дзень памяці продкаў :: Хартыя'97 :: Навiны

Гэта старадаўняя рэлігійна-народная традыцыя, дзень памяці продкаў. У гэты дзень ходзяць на могілкі, гатуюць дома абрадавыя стравы. «Дзяды -- гэта для нас, беларусаў, асаблівае сьвята. Яно зьвязанае з сэнсам і з вечнасьцю чалавечага існаваньня. У Дзядах праецыруецца народны лёс. Невыпадкова вялікі твор беларускай культуры і рамантычнай літаратуры на польскай мове быў прысьвечаны Дзядам. Я маю на ўвазе твор Адама Міцкевіча. У Дзядах закладзена моцная сымболіка -- сымболіка несьмяротнасьці і духоўнага адзінства народа», -- заявіў у інтэв’ю “Радыё Свабода” лідэр Кансерватыўна-Хрысціянскай партыі БНФ, гісторык Зянон Пазьняк, які ў 1988 годзе адкрыў сьвету праўду пра Курапаты.

“Мяне, шчыра скажу, грэе, што новае беларускае Адраджэньне і Народны Фронт пачаліся з Курапатаў і зь Дзядоў. Я бачу ў гэтым добры знак адраджэньня нашага народу і нашай вялікай дзяржавы. І таму ўсё, што робіцца цяпер на Беларусі кепскага, я успрымаю як выпрабаваньне Ідэі, якое трэба вытрымаць, і ў якім трэба перамагчы.

Да добрых сымбалях трэба ставіцца паважна, бо яны ўздымаюць дух і мацуюць сілу. Тым часам Дзяды -- гэта і сымбаль, і рэальнасьць адначасна. Курапаты -- гэта рэальнасьць, дух неадпомшчаных продкаў -- гэта сымбаль, ідэя, якая кліча да ўсталяваньня справядлівасьці. Паважайма магілы, шануйма продкаў, любім Беларусь!”, -- заявіў Зянон Пазняк.