Еўракамісія мае намер змяніць умовы будучых пашырэнняў ЕЗ :: Хартыя'97 :: Навiны

Выканаўчы орган Еўрапейскага Звяза – Еўрапейская Камісія – вызначыла асноўныя ўмовы, якімі будзе кіравацца Брусэль у дачыненні да пашырэння ЕЗ за конт прыёму новых краін, пасля інтэграцыі 1 студзеня будучага года Балгарыі і Румыніі.

Як паведамляе ў чацвер гішпанская газета "Паіс", якая атрымала доступ да падрыхтаванага дакладу на тэму "Здольнасць Звяза інтэграваць новых сяброў", мэта новага падыходу да пашырэння ЕЗ – процідзейнічаць "палітычнаму клімату варожасці да краін-навічкоў, што расце" у гэтым еўрапейскім "клубе". Па дадзеных статыстычнага ведамства "Еўрабарометр", "падтрымка грамадзянамі ЕЗ новых пашырэнняў панізілася за апошнія два гады з 52% да 45%". Зараз Еўрапейская Камісія прапаноўвае "павялічыць дэмакратычную легітымнасць" будучых уступаў у ЕЗ, патрабуючы для гэтага ўхвалення яго грамадзянамі.

Па меркаванні Брусэля, адзначае газета, апошнія пяць пашырэнняў Звяза "былі паспяховымі з пункту гледжання палітыкі і эканомікі, але дрэнна зразумелыя жыхарамі" ЕЗ з-за недастатковага растлумачэння ў СМІ. Намер далейшага ўключэння ў склад аб`яднання краін Заходніх Балканаў, а таксама Турэччыны, "сур`ёзна пацярпеў пасля адмоўных вынікаў рэферэндумаў аб адзінай еўрапейскай канстытуцыі ў Францыі і Галандыі" у 2005 годзе".

"Паіс" піша, што на працягу ўсяго цяперашняга года Францыя падкрэслівае "неабходнасць улічваць так званую здольнасць абсарбавання Звязам новых удзельнікаў, перш чым вырашацца на прыём новых сяброў. Яшчэ ў сакавіку 2005 года Парыж змяніў канстытуцыю краіны, якая зараз прадугледжвае, што пасля ўступа ў ЕЗ Харватыі, прыняццю любой новай краіны павінен папярэднічаць рэферэндум у Францыі".

У дакладзе Камісіі, падкрэслівае газета, паняцце "здольнасць абсарбаваць" будзе змененае на "здольнасць інтэгравацца", што прадугледжвае здольнасць навічкоў прыстасоўвацца да нормаў, дзеючых у Звязе, не ставячы пад пагрозу палітыку і палітычныя мэты, якія змяшчаюцца ў дамовах аб стварэнні гэтага аб`яднання.

Акрамя таго, адзначае "Паіс" выканаўчы орган ЕЗ лічыць, што пашырэнне за межы 27 удзельнікаў, якіх Звяз будзе налічваць з 1 студзеня 2007 года, запатрабуе правядзення інстытуцыянальных рэформаў.

Даклад Еўрапейскай Камісіі будзе вынесены на абмеркаванне ўдзельнікаў Савета ЕЗ, які збярэцца 13 лістапада, а ў снежні стане галоўнай тэмай чарговай сустрэчы лідэраў Звяза.