Амбасадары ЗША і ЕЗ усклалі вянкі ва ўрочышчы Курапаты :: Хартыя'97 :: Навiны

Амбасадары краін Еўразвяза і ЗША наведалі сёння ўрочышча Курапаты, дзе ў 30-40 гады мінулага стагоддзя былі масавыя растрэлы ахвяр сталінскіх рэпрэсій. "Мы тут для таго, каб ушанаваць памяць тых, хто загінуў тут ад рэпрэсій", – сказала Надзвычайная і Паўнамоцная амбасадарка ЗША у Беларусі Карэн Сцюарт.

"Ва ўсіх краінах лічыцца, што захаванне памяці аб падобных ахвярах – адна з гарантый таго, каб такія трагедыі не паўтараліся", – падкрэсліла амерыканская дыпламатка.

Па прыведзеных гісторыкам Ігарам Кузняцовым дадзеных, на тэрыторыі Курапатаў пахавана не менш за 30 тысяч чалавек. Тэрыторыя масавага пахавання займае 15 гектараў. Сярод расстраляных ёсць прадстаўнікі практычна ўсіх краін Еўропы і ЗША.

Па меркаванні гісторыкаў, каля 20% рэпрэсаваных у Беларусі былі палякамі. На сённяшні дзень вядомыя толькі 2 прозвішчы расстраляных у Курапатах. Падчас раскопак, якія праводзіліся ў Курапатах тройчы, гісторыкі не знаходзілі фактычна ні аднаго дакумента расстраляных, што ўскладняе ідэнтыфікацыю рэшткаў.

На тэрыторыі ўрочышча ўсталяваны мемарыяльны знак ад імя народа ЗША, адчынены падчас візіту ў Беларусь прэзідэнта ЗША Біла Клінтана 15 красавіка 1995 года. Мемарыяльны знак уяўляе сабою мармуровы лаўку з металічным вянком. Аднак нядаўна вянок быў выкрадзены, мармуровую пліту таксама некалькі разоў спрабавалі вынесці, некалькі разоў апаганьвалі фашысцкай свастыкай. Вінаватыя ў вандалізме ні разу не былі знойдзеныя.

У наступным годзе да чарговага дня памяці – 30 кастрычніка – на тэрыторыі Курапатаў за конт сродкаў грамадскасці будзе адчыненая памятная пліта, паведаміў І.Кузняцоў.