У галадоўцы салідарнасці з Казуліным гатовыя ўдзельнічаць 30 чалавек :: Хартыя'97 :: Навiны

Пятыя суткі ў Берасьці працягваецца “галадоўка салідарнасці” з былым кандыдатам на прэзыдэнта Аляксандрам Казуліным. У акцыі ўдзельнічаюць сябры Беларускай сацыял-дэмакратычнай партыі (Грамада), а таксама актывісты іншых палітычных партыяў і грамадскіх арганізацыяў.

Ад сёньня ў офісе берасцейскай абласной арганізацыі Беларускай сацыял-дэмакратычнай партыі (Грамада) вывешаны расклад, паводле якога да галадоўкі будуць далучацца сябры арганізацыі. Са словаў кіраўніка акцыі Ігара Маслоўскага, ужо амаль 30 прозьвішчаў чальцоў партыі зафіксаваная ў спісе чарговасці:

“Мы бачылі даследаванне прафэсара Манаева, што толькі каля 45% насельніцтва Беларусі ведаюць, што Аляксандар Казулін цяпер за кратамі. Таму менавіта гэтая галадоўка адбываецца ланцужком, каб прыцягнуць як мага болей увагі. Мы маем намер доўжыць акцыю да таго часу, пакуль у турме галадае спадар Казулін”, -- паведаміў Маслоўскі для “Радыё Свабода”.

Нагадаем, што кожнаму, хто далучаецца да акцыі, рэкамендуецца галадаць адзін-пяць дзён.

Экс-кандыдат у прэзідэнты Аляксандр Казулін і былы дэпутат Сяргей Скрабец абвясцілі ў калоніі бестэрміновую галадоўку ў знак пратэсту супраць "існуючага ў Беларусі беззаконня" і з мэтай прыцягнуць увагу Савета Бяспекі ААН да сітуацыі ў Беларусі.