Прэзідэнт Літвы святкуе 80-годдзе :: Хартыя'97 :: Навiны

Прэзідэнт Літвы Валдас Адамкус (Valdas Adamkus) у пятніцу святкуе сваё 80-годдзе. Як паведамілі "Інтэрфаксу" у прэс-службе кіраўніка дзяржавы, у дзень нараджэння В.Адамкус прыме старшыню сейма Віктараса Мунцянаса (Viktoras Muntianas) і кіраўнікоў парламенцкіх фракцый, сяброў урада, іншых службовых асоб.

В.Адамкус, які нарадзіўся 3 лістапада 1926 года ў Каўнасе (Kaunas, другі па велічыні горад Літвы), у ліпені 1944 года разам з бацькамі эміграваў у Нямеччыну. У тым жа годзе вярнуўся ў Літву і ў складзе групы добраахвотнікаў удзельнічаў у баях супраць Савецкага войска, пасля чаго ізноў выехаў за межы Літвы. У Мюнхене (Нямеччына) паступіў ва ўніверсітэт.

У 1949 годзе В.Адамкус з сям`ёй пераехаў у ЗША. У 1960 г. у Ілінойскім універсітэце атрымаў спецыяльнасць інжынера-будаўніка. У 1981 г. заняў пост адміністратара пятага (Цэнтральна-Заходняга) рэгіёна Агенцтва аховы навакольнага асяроддзя ЗША, на гэтай пасадзе працаваў да вясны 1997 года

У студзені 1998 года быў абраны прэзідэнтам Літвы, пасля заканчэння пяці гадоў (у канцы 2002 – пачатку 2003 года) дамагаўся абрання на другі тэрмін, але ў другім туры выбараў прайграў Роландасу Паксасу (Rolandas Paksas), які праз паўгода апынуўся ў цэнтры скандалу і ў красавіку 2004 г. імпічментам зняты з паста прэзідэнта.

На датэрміновых прэзідэнцкіх выбарах у 2004 г. В.Адамкус абраны прэзідэнтам Літвы на другі пяцігадовы тэрмін.

В.Адамкус меў падвойнае – літоўскае і амерыканскае – грамадзянства, пасля абрання на пасаду прэзідэнта Літвы ў 1998 г. адмовіўся ад грамадзянства ЗША. Яго жонка Алма Адамкенэ (Alma Adamkiene) захоўвае падвойнае грамадзянства.