Беларусь не змагла прайсці ў ЭКАСАС ААН :: Хартыя'97 :: Навiны

У ААН у чацвер адбыліся выбары ў Эканамічны і Сацыяльны Савет (ЭКАСАС) – не атрымалася запоўніць вакансіі толькі ад Усходняй Еўропы. Неабходныя дзве трэці галасоў у першым туры галасавання ў групе ўсходнееўрапейскіх краін атрымала толькі Румынія. Другі тур галасавання паміж Беларуссю і Балгарыяй не быў паспяховым – ні адна з краін не атрымала неабходнай падтрымкі.

За Беларусь прагаласавалі 90 дзяржаў, за Балгарыю – 89. Для таго каб быць абранымі ім патрабавалася заручыцца падтрымкай як мінімум 120 краін.

Цяперашнія выбары ў ЭКАСАС праходзяць на трохгадовы перыяд, які пачынаецца з 1 студзеня 2007 года.

ЭКАСАС з`яўляецца галоўным органам ААН па вырашэнні міжнародных праблем у эканамічнай і сацыяльнай абласцях, а таксама аб ахове здароўя, культуры і адукацыі. Cавет складаецца з 54 сяброў, якія абіраюцца Генеральнай Асамблеяй ААН на тры гады.