9 лістапада ў Менску адбудзецца акцыя памяці ахвяр фашызму :: Хартыя'97 :: Навiны

9 лістапада, у Міжнародны дзень барацьбы з фашызмам і антысемітызмам, па ўсім свеце праходзяць акцыі памяці ахвяр фашызму і нацыянальнай сегрэгацыі. У Менску 9 лістапада таксама адбудзецца акцыя салідарнасці і памяці ахвяр фашызму. Ініцыятары мерапрыемства заклікаюць сабрацца ў 19-00 на Юбілейнай плошчы Менска і пасля гэтага сумесна рушыцца да памятнага мемарыяла "Яма", каб ускласці кветкі і запаліць прынесеныя з сабою свечкі.

Ініцыятары акцыі заклікаюць беларусаў "выявіць сваю грамадзянскую салідарнасць і паказаць, што ім блізкія каштоўнасці нармалёвай цывілізаванай чалавечай супольнасці, якая асуджае фашызм і рэпрэсіі", – паведамляе АФН.

У ноч з 9 на 10 лістапада 1938 па ўсёй Нямеччыне прайшлі габрэйскія пагромы, якія атрымалі пасля назву "Крыштальнай ночы" (з-за мноства аскепкаў шкла, што ўсейвалі вуліцы). У гэтую ноч загінула 92 габрэя, па ўсёй Нямеччыне былі падпаленыя сінагогі, звыш сямі тысяч крам былі разбураныя і разрабаваныя. Каля 30 тысяч габрэяў былі арыштаваныя і высланыя ў канцэнтрацыйныя лагеры, а на габрэяў у цэлым быў накладзены штраф у мільярд марак.

Пасля "Крыштальнай ночы" большасць габрэйскіх арганізацый і ўстаноў былі зачыненыя, а назіранне за габрэямі было перададзена ў рукі гестапа. З гэтага дня пачалася жудасная гісторыя Халакоста.