Прафсаюзная актывістка галадае 38-ы дзень :: Хартыя'97 :: Навiны

6 лістапада працаўніцу ААТ "Белшына" Алену Захожую выпісалі з Цэнтральнага гарадскога шпіталя Бабруйска. Як паведаміў БелаПАН сын А.Захожай Яўген, выпісу папярэднічаў кансіліўм лекараў. "Загадчык пульманалагічнага аддзялення Уладзімір Гацко сказаў, што ціск ёй збілі, кардыёграму палепшылі", – распавёў Яўген. Разам з гэтым ён падкрэсліў, што яго маці па-ранейшаму адмаўляецца прымаць ежу. Па словах Яўгена, лекары заявілі, што ўжо сёння Алена Захожая можа выйсці на працу. Ён таксама паведаміў, што, пакідаючы шпіталь, яго маці дрэнна сябе адчула і звалілася. У цяперашні час яна знаходзіцца дома.

Нагадаем, што актывістка першаснай арганізацыі Беларускага незалежнага прафсаюза (БНП) працаўнікоў "Белшыны" Алена Захожая галадае з 3 кастрычніка. Яна патрабуе зарэгістраваць першасную арганізацыю БНП. Для гэтага неабходна, каб адміністрацыя ААТ "Белшына" надала прафсаюзу юрыдычны адрас, аднак наймальнік адмаўляецца гэта рабіць. Акрамя таго, Захожая патрабуе выплаціць сябрам БНП прэміі і даплаты на аздараўленне, якія ўжо атрымалі астатнія працаўнікі прадпрыемства. 31 кастрычніка А.Захожая была дастаўленая ў шпіталь пасля таго, як страціла прытомнасць на працоўным месцы.

1-2 лістапада адбыліся перамовы паміж прадстаўнікамі БНП і кіраўніцтвам "Белшыны". Як паведаміў БелаПАН старшыня БНП Васіль Корабаў, у бакоў атрымалася дасягнуць дамоўленнасцяў па пытаннях выплаты прэмій і даплат на аздараўленне сяброў незалежнага прафсаюза. Ён таксама паведаміў, што пытанне аб спыненні галадоўкі будзе разгледжанае 9-10 лістапада.

А.Захожая, у сваю чаргу, назвала вынікі перамоваў, якія адбыліся, "нулявымі".