Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Суддзя Светлагорскага раённага суду Наталля Белайчук 4 лістапада абвясціла прысуд па крымінальнай справе ў дачыненні да былога суддзі Сяргея Ярашэвіча. Апошні прызнаны вінаватым у абразе суддзяў з Рагачова Уладзіміра Саламейчука і Мікалая Рубісава і прысуджаны да двух гадоў выпраўленчых прац з вылічваннем у прыбытак дзяржавы 20% заробку. Падставай для крымінальнага пераследу Ярашэвіча стаў ягоны запіс у кнізе заўваг і прапаноў Рагачоўскага суду. Ён меў неасцярожнасць параўнаць рагачоўскіх суддзяў з суддзямі 1937 года, якія наладжваюць судзілішча па прынцыпе: быў бы чалавек, а артыкул знойдзецца.
Рагачоўскія суддзі ўвесну гэтага года па чарзе разглядалі даволі блытаную крымінальную справу ў дачыненні Сяргея Ярашэвіча, абвінавачанага ў хуліганстве з нанясеннем лёгкіх цялесных пашкоджанняў былому супрацоўніку жлобінскай міліцыі.
У Рагачоўскім суддзе Ярашэвіча аштрафавалі на 3 мільёны 100 тысяч рублёў. Разгляд і прысуд ён палічыў неаб`ектыўным, таму ў знак пратэсту і зрабіў запіс у кнізе заўваг і прапаноў. У выніку – чарговая крымінальная справа і чарговы прысуд. Адзначым, наколькі вядома, першы такі ў краіне. "У нас апраўдальных прысудаў не бывае. З сістэмай немагчыма змагацца. Сваім запісам у кнізе заўваг я паказаў факт таго, што ў нашай рэспубліцы могуць асудзіць невінаватага чалавека – не простага чалавека, хто далёкі ад юрыспрудэнцыі. Нават юрыста могуць прызнаць вінаватым, і ён бяспраўны, не зможа даказаць сваю невінаватасць. І я як бы стаў ворагам усёй сістэмы", – сказаў у інтэрв`ю БелаПАН былы суддзя Сяргей Ярашэвіч.
Суддзя Наталля Белайчук лічыць, што Сяргей Ярашэвіч пісьмова абразіў рагачоўскіх суддзяў пры ажыццяўленні імі правасуддзя. Запіс у кнізе, па яе словах, можа прачытаць любы. Адсюль і пакаранне.
Сяргей Ярашэвіч мае намер абскардзіць прысуд у вышэйшую судовую інстанцыю. Па яго меркаванні, кніга заўваг і прапаноў існуе для таго, каб любы чалавек мог выказаць сваё меркаванне з нагоды таго, як з ім абыходзіліся тыя альбо іншыя дзяржаўныя службоўцы, у тым ліку і суддзі.
