ЗША і ЕЗ яшчэ спадзяюцца на празрыстасць выбараў у Беларусі :: Хартыя'97 :: Навiны

Амбасадарка ЗША у Беларусі Карэн Сцюарт выказала надзею, што працэс мясцовых выбараў у Беларусі будзе празрыстым і справядлівым. Нагадаем, што выбары ў мясцовыя Саветы ў Беларусі адбудуцца 14 студзеня 2007 года. "ЗША, Еўразвяз і іншыя міжнародныя структуры ўважліва сочаць за падзеямі ў Беларусі з пункта гледжання забеспячэння празрыстага і справядлівага працэсу падчас выбараў у мясцовыя Саветы, якія маюць быць", – заявіла амерыканская амбасадарка ў сераду ў Менску, перадае "Інтэрфакс".

Сцюарт падкрэсліла, што ЗША "па-ранейшаму дапамагаюць розным дзяржавам свету, у тым ліку Беларусі, у імкненні да ўсталявання дэмакратыі і дэмакратычных ідэалаў". Амбасадарка таксама зазначыла, што садзейнічанне дэмакратыі ў Беларусі будзе з`яўляцца "адным з яе асноўных абавязкаў на працягу трох гадоў".

Карэн Сцюарт у размове з журналістамі адзначыла, што яна "тут дзеля таго, каб прадстаўляць прэзідэнта Буша і амерыканскі народ". "Мы ўжо доўгі час працягваем руку сяброўства беларускаму народу", – заявіла дыпламатка.

Кажучы аб выбарах у Кангрэс, якія адбываюцца ў цяперашні час, Сцюарт падкрэсліла вялікае значэнне гэтай выбарчай кампаніі. "Вялікая верагоднасць змянення большасці ў Палаце прадстаўнікоў і ў Сенаце. Калі дэмакраты атрымаюць перамогу, адміністрацыя Буша сутыкнецца з вялікімі перашкодамі", – сказала яна.