Еўразвяз патрабуе вызваліць беларускіх палітвязняў :: Хартыя'97 :: Навiны

Еўрапейскі звяз выказвае глыбокую заклапочанасць прысудам, які быў вынесены 1 лістапада лідэру "Маладога Фронту" Зміцеру Дашкевічу. Аб гэтым гаворыцца ў афіцыйнай заяве, распаўсюджанай 8 лістапада прэс-службай Рады ЕЗ. У заяве ЕЗ таксама выказвае сваю заклапочанасць станам экс-кандыдата ў прэзідэнты Беларусі Аляксандра Казуліна і заклікае беларускія ўлады дазволіць сваякам палітыка і міжнародным назіральнікам сустрэчы з ім.

Нагадаем, З.Дашкевіч быў асуджаны на адзін год і шэсць месяцаў пазбаўлення волі ў калоніі агульнага рэжыму за дзейнасць ад імя незарэгістраванай арганізацыі (арт. 193-1 Крымінальнага кодэкса). Такое рашэнне прыняла 1 лістапада суддзя Кастрычніцкага раёна Менска Ала Булаш.

"Абвінавачванні ў кіраўніцтве незарэгістраванай арганізацыяй, прад`яўленыя З.Дашкевічу, выглядаюць палітычна матываванымі, – адзначаецца ў заяве. – Беларускія ўлады ў чарговы раз прадэманстравалі сваё нежаданне паважаць міжнародныя нормы ў вобласці правоў чалавека, асабліва правы на непрадузяты суд". ЕЗ таксама асуджае рашэнне аб правядзенні зачыненага судовага працэсу, падкрэсліваецца ў заяве.

У заяве ЕЗ таксама зноў выказвае сваю заклапочанасць станам экс-кандыдата ў прэзідэнты Беларусі Аляксандра Казуліна і заклікае беларускія ўлады дазволіць сваякам палітыка і міжнародным назіральнікам сустрэчы з ім. А.Казулін, які быў асуджаны на пяць з паловай гадоў пазбаўлення волі, 20 кастрычніка пачаў бестэрміновую палітычную галадоўку пратэста. 31 кастрычніка начальнік калоніі "Віцьба-3" Віталь Агністыкаў забараніў А.Казуліну сустрэчы з адвакатам Ігарам Рынкевічам на ўвесь тэрмін галадоўкі.

ЕЗ заклікае беларускія ўлады неадкладна вызваліць З.Дашкевіча, А.Казуліна, сябраў грамадзянскай ініцыятывы "Партнёрства" і ўсіх палітычных зняволенных.