Уладзімір Колас прадставіў кнігу аб Беларускім ліцэі :: Хартыя'97 :: Навiны

Кінарэжысёр і педагог Уладзімір Колас прадставіў 8 лістапада ў Менску кнігу "Лес ліцэя". Яна выпушчаная санкт-пецярбургскім выдавецтвам "Неўскі праспект". У сваіх аўтабіяграфічных занатоўках аўтар – дырэктар зачыненага ўладамі Нацыянальнага дзяржаўнага гуманітарнага ліцэя імя Якуба Коласа распавядае аб сваім жыццёвым шляху, які прывёў яго да стварэння ў 1990 годзе вядомай ва ўсім свеце навучальнай установы, а таксама аб выніках і высновах гэтай працы.

Як адзначыў Уладзімір Колас, у яго не было думкі пісаць кнігу і нават ствараць ліцэй. "Аднак ёсць наканаванне лёсу, з якім варта жыць у гармоніі, а не змагацца з ім. І я ўдзячны лёсу, які дазволіў прылучыцца да вялікай святой справы", – сказаў аўтар.

Уладзімір Колас паведаміў, што падставай для кнігі сталі яго выступы ў эфіры "Радыё Свабода".

"Ад нядзельнай школы, створанай яшчэ ў Савецкім Саюзе, мы прайшлі шлях да сусветна вядомай навучальнай установы ў незалежнай Беларусі. Аднак сёння ліцэй знаходзіцца ў сітуацыі, якая нагадвае пачатак нашага шляху. Так што ад нуды мы не памрэм, бо нам яшчэ шмат што трэба зрабіць", – заявіў Колас.

Па словах загадчыка навучальнай частцы былога ліцэя Ірыны Сідарэнкі, навучальная ўстанова – гэта больш за 500 выпускнікоў, стопрацэнтнае паступленне ў вну, конкурс да 18 чалавек на месца, знакамітыя выкладчыкі, конкурсы і алімпіяды, сустрэчы са знакамітымі сучаснікамі, сяброўства і самадастатковасць. Па меркаванні І.Сідарэнкі, сваю кнігу аб навучальнай установе можа напісаць кожны яе выпускінк і выкладчык.

Па словах намесніка дырэктара ліцэя Лявона Баршчэўскага, зачыненая ўладамі ў 2003 годзе навучальная ўстанова з самога пачатку мела прывабную ідэю – забяспечыць прэстыжнае выкладанне на беларускай мове і даць маладым людзям годную адукацыю. Л.Баршчэўскі адзначыў, што артыкулы аб ліцэі ўключаныя ў энцыклапедыі, у тым ліку у 18-томную "Беларускую энцыклапедыю" і 6-томную "Энцыклапедыю гісторыі Беларусі", паведамляе БелаПАН.

ddddd