Беларускі МЗС адпомсціў немцам за неўяздных беларускіх чыноўнікаў :: Хартыя'97 :: Навiны

Беларускі бок адмовіў ў выдачы віз для ўезду ў Беларусь для ўдзелу ў 9-м Менскім форуме некаторым дэпутатам нямецкага Бундэстага і прадстаўнікам сродкаў масавай інфармацыі ФРГ у адказ на дзеянні нямецкага боку і Еўразвяза. Аб гэтым сёння паведаміў прэс-сакратар Міністэрства замежных спраў Андрэй Папоў. "Беларускі бок быў вымушаны прыняць семітрычныя меры ў якасці рэакцыі на абмежаванні ў дачыненні нашай краіны з боку ЕЗ, ЗША і шэрагу іншых дзяржаў. Магчымасць прыняцця такіх мераў была агучаная на брыфінгу ў МЗС 8 чэрвеня гэтага года. Такім чынам, гэтыя меры не павінны былі з`явіцца нечаканасцю для арганізатараў форума", – падкрэсліў афіцыйны прадстаўнік знешнепалітычнага ведамства.

"У гэтай сувязі яшчэ раз звяртаем увагу, што сярод беларускіх грамадзянаў, у дачыненні якіх уведзеныя візавыя абмежаванні і да якіх далучылася ФРГ, знаходзяцца, у тым ліку, прадстаўнікі беларускага "парламента" і СМІ. Мы лічым, што логіку дэпутатаў Бундэстага і журналістаў, агучаную ў інтэрв`ю "Нямецкай хвалі" адносна таго, хто насамрэч "перашкаджае дыялогу" і "свабоднаму абмену інфармацыяй", варта, першым чынам, ужыць у дачыненні да ініцыятараў абмежавальных мераў датычна Беларусі, а не адказных крокаў з нашага боку, якія мы змушаныя зрабіць, – сказаў Андрэй Папоў. – Што датычыцца дэпутатаў Еўрапарламента, то ім адмоўлена ва ўездзе ў Рэспубліку Беларусь для ўдзелу ў двухбаковым беларуска-нямецкім мерапрыемстве".

Па словах прэс-сакратара МЗС, "пытанне выдачы віз дэпутатам Еўрапарламента, якія пажадаюць прыехаць у нашую краіну для абмеркавання любых пытанняў супрацоўніцтва паміж дэпутатамі "нацыянальнага сходу" Беларусі і дэпутатамі Еўрапарламента, будзе разглядацца ва ўсталяваным парадку пасля ўзгаднення фармату і змястоўнай часткі сустрэч". "Менавіта з гэтага пункту гледжання і варта разглядаць словы пасла Беларусі ў Бельгіі Уладзіміра Сінько аб тым, што "Менск адчынены для дыялогу з ЕЗ", – дадаў Андрэй Папоў.

Нагадаем, што 9-12 лістапада беларускую сталіцу з візітам збіраліся наведаць прадстаўнікі дэлегацыі Еўрапейскага парламента па сувязях з Беларуссю, а таксама некалькіх дэпутатаў Бундэстага. Дэпутаты планавалі прыняць удзел у 9-м Менскім форуме, аднак ім было адмоўлена ў атрыманні беларускіх уязных віз. Адмова ў візах дэпутатам Еўрапарламента была фармальна растлумачана тым, што беларускія ўлады разглядаюць Менскі Форум як строга двухбаковае беларуска-нямецкае мерапрыемства без удзелу ў ім еўрапейскага кампанента і, такім чынам, Еўрапейскага Парламента. Чаму не пусцілі дэпутатаў Бундэстага, стала вядома толькі сёння.

Нагадаем, што кіраўнік дэлегацыі Еўрапейскага парламента па сувязях з Беларуссю Богдан Кліх выказаў глыбокае шкадаванне і рашуча асудзіў адмову беларускіх улад выдаваць візы на наведванне краіны дэпутатамі Еўрапарламента. "Калі б візіт адбыўся, прадстаўнікі дэлегацыі атрымалі б магчымасць наведаць Беларусь упершыню з 2002 года і азнаёміцца з сітуацыяй асабіста", – падкрэсліў Б.Кліх. Па яго меркаванні, сабраная і перададзеная ў Еўрапарламент інфармацыя паслужыла б "далейшаму фармаванню пазіцыі ў дачыненні рэспублікі". "Таму выклікае шкадаванне той факт, што ўрад Беларусі ў чарговы раз вырашыў працягваць шлях самаізаляцыі", – адзначыў Б.Кліх. Па яго словах, падобнае рашэнне "ідзе насуперак з заявай амбасадара Беларусі ў Брусэлі Уладзіміра Сінько ў рамках апошняй сустрэчы дэлегацыі ў кастрычніку аб тым, што Менск адчынены для дыялогу з ЕС".

Польскі дэпутат заявіў аб адсутнасці "прыкмет, якія паказваюць на змены ў пазіцыі беларускіх улад"; становішча з дэмакратыяй, правамі чалавека і вяршэнствам закона ў Беларусі "працягвае пагаршацца".