«Свабодны тэатр» супраць гвалту (Фота) :: Хартыя'97 :: Навiны

7 лістапада ў адным з катэджаў, што размешчаныя каля Менска, "Свабодны тэатр" прадставіў гледачам сваю галоўную прэм`еру восені – спектакль "Быць Гаральдам Пінтэрам". Гэты спектакль стаў першай пастаноўкай у Беларусі, што створана па творах Нобелеўскага лаўрэата Гаральда Пінтэра.

Рэжысёр Уладзімір Шчэрбань выкарыстаў у спектаклі чатыры п`есы Гаральда Пінтера: "Перад дарогай", "Горская мова", "Новы сусветны парадак" і "Прах да праху", а таксама тэкст яго Нобелеўскай прамовы і ліста з турмаў беларускіх палітвязняў. Адзначым, што п`есы "Прах да праху" і "Новы сусветны парадак" былі ўпершыню перакладзеныя на рускую мову Алегам Шафранавым непасрэдна для пастаноўкі "Свабоднага тэатра".

Пастаноўцы спектакля "Быць Гаральдам Пінтэрам" папярэднічала перапіска з аўтарам, які, ведаючы пра становішча, у якім прыходзіцца існаваць незалежнаму тэатральнаму калектыву, дазволіў "Свабоднаму тэатру" выкарыстаць свае творы без якіх-небудзь выплат аўтарскай узнагароды.

У сваім лісце Гаральд Пінтэр напісаў "для мяне з`яўляецца гонарам, што "Свабодны тэатр "вырашыў ставіць спектакль па маіх творах". Ён таксама шкадаваў аб тым, што не зможа прысутнічаць на прэм`еры спектакля: "Я б вельмі хацеў прыехаць на прэм`еру, але зараз вельмі сур`ёзна хварэю і практычна не ўстаю з інваліднага крэсла". Спадар Пінтэр смуткаваў, што вымушаны рэпетыраваць "Апошнюю стужку Крэпа" Самюэля Бекета, практычна не паднімаючыся з крэсла, і пабаяўся, што пералёт у Менск забярэ ў яго ўсе сілы, гэтак неабходныя для прэм`еры спектакля.

Пастаноўка кожнага спектакля "Свабоднага тэатра" прысвечаная адной з праблем, што існуюць у грамадстве. Не стаў выключэннем і спектакль "Быць Гаральдам Пінтэрам", які быў вынесены на суд гледачоў пад лозунгам Stop Violence! (Спыніць гвалт!)