У Берасці будут судзіць 10 актывістаў апазіцыі :: Хартыя'97 :: Навiны

10 актывiстаў кампанii "За свабоду", затрыманых падчас акцыi Дзень салiдарнасцi 16 кастрычнiка, атрымалi позвы ў суд. Іх абвiнавачваюць ва ўдзеле ў несанкцыянаваным мерапрыемстве. Пакаранне за гэта правапарушэнне прадугледжвае штраф у памеры ад 20 да 150 базавых велiчынь (300-2000$), адмiнiстратыўны арышт на тэрмiн ад трох да пятнаццацi сутак цi папярэджанне. Суд прызначаны на 15 лiстапада.

Нагадаем, што 16 кастрычнiка 2006г. у Берасцi адбылася акцыя "Дзень салiдарнасцi". Маладыя людзi, актывiсты грамадскiх арганiзацый i палiтычных партый стаялi са свечкамi ў руках на вул. МОПРа. Падчас акцыi былi затрыманыя 14 актывiстаў, сярод якiх прадстаўнiкi "Маладога фронту", Моладзi БНФ, "Дзедзiча", iншых арганiзацый i партый. Іх завялi ў апорны пункт мiлiцыi, перапiсалi пашпартныя дадзеныя i адпусцiлi.

11-13 лiстапада ўсiм затрыманым патэлефанавалi мiлiцыянты i запрасiлi ў Маскоўскi РАУС "для гутаркi". Замест гэтага намеснiк начальнiка ААПП Аляксандр Тарасевiч склаў на маладых людзей адмiнiстрацыйныя пратаколы за парушэнне арт. 167-1 Кодэкса аб адмiнiстрацыйных правапарушэннях РБ, то бок за ўдзел у несанкцыянаваным мерапрыемстве i ўручыў позвы ў суд.

Варта адзначыць, што большасць затрыманых з`яўляецца кандыдатамi ў дэпутаты Берасцейскага гарсавета цi сябрамi iнiцыятыўных груп па зборы подпiсаў. Андрэй Шарэнда, адзiн з затрыманых, выказаў меркаванне, што дзеяннi мiлiцыянтаў выклiканы жаданнем уладаў перашкодзiць iм удзельнiчаць у выбарах праз значныя грашовыя пакараннi цi адмiнiстратыўныя арышты i запужаць маладых людзей.