Чаму Лукашэнка куляй выляцеў з Масквы? :: Хартыя'97 :: Навiны

Сустрэча ў пятніцу прэзідэнтаў Расеі і Беларусі не была падобная на сяброўскую. Яна глядзелася хутчэй як выклік на дыван. Дзе ў якасці "выкліканага" выступіў беларускі кіраўнік. Не сакрэт, што Масква высунула цэлы шэраг непрыемных для Лукашэнкі запатрабаванняў. Нягледзячы на тое, што гутарка з Пуціным працягвалася тры з паловай гадзіны, вырашыць пытанні ў сваю карысць у Лукашэнкі не атрымалася. Зрэшты, у Прэзідэнта Расеі ў сваю – таксама, піша газета "Московский Комсомолец".

Перамовы з Прэзідэнтам Расеі не абяцалі Лукашэнку нічога добрага. Як ужо пісаў "МК", Масква патрабуе ад Менска выплачваць 85% сумы ад экспартных пошлін на нафту. Чорнае золата Расея пастаўляе ў Беларусь бязпошліна, і ў значна большых аб`ёмах, чым патрабуецца рэспубліцы. У сваю чаргу, беларусы пасля перапрацоўкі нафты “гоняць” яе ў трэція краіны. За грошы, зразумела. А ўсе прыбыткі паступаюць у беларускую казну. Зразумела, гэты факт стаў вядомы не ўчора і не сёння. Проста ў Маскве, відавочна, вырашылі істотна зрэзаць “фундатарскую дапамогу” рэжыму Лукашэнкі.

Яшчэ адно вострае пытанне – меркаванае з новага года падвышэнне кошту на газ для Беларусі. Зрэшты, гэтага падвышэння можна пазбегнуць, калі прэзідэнт брацкай рэспублікі згадзіцца прадаць “Газпрому” палову акцый “Белтрансгаза”. Але ў тым і справа, што Лукашэнка нічога не жадае прадаваць...

"Паважаны Аляксандр Рыгоравіч! Дазвольце мне вас павітаць. Я вельмі рады вас бачыць напярэдадні саміту СНД у Менску 28 лістапада. Вы яго запланавалі?" – спытаў Пуцін. На яго твары гуляла здзеклівая ўсмешка. Прэзідэнт Расеі зручна размясціўся ў крэсле і відавочна адчуваў сябе гаспадаром становішча. Чаго нельга сказаць пра Аляксандра Лукашэнку. У вачах беларускага кіраўніка застыла насцярожанае чаканне. "Так", – кіўнуў Лукашэнка. "Планаваў пагаварыць з вамі аб будаўніцтве «саюзнай дзяржавы» і па эканамічных пытаннях. У нас развіваюцца адносіны вельмі паспяхова, – працягнуў УУП, – але ёсць і пытанні".

Сустрэча кіраўнікоў дзяржаў цягнулася тры з паловай гадзіны, але, судзячы па адсутнасці выразных каментароў пасля яе заканчэння, ні да чаго дамовіцца ў суразмоўцаў не атрымалася.

У Беларусі аб выніках сустрэчы двух прэзідэнтаў таксама не вельмі распаўсюджваюцца. Аднак палітолагі адзначаюць адну дзіўнасць. Звычайна Лукашэнка прыязджае ў Маскву на некалькі сутак. І у гэты раз візіт быў запланаваны мінімум на два дні. І ў адзін з іх Лукашэнка павінен быў адкрыць помнік Янку Купале ў Маскве. Помнік не адкрылі, таму што, як толькі выйшаў ад Пуціна, Лукашэнка рынуўся ў аэрапорт і паляцеў назад ў Менск.