У Беластоке будуць мяняць Дзіму на Сашу :: Хартыя'97 :: Навiны

16 лістапада ў 17:00 каля беларускага консульства ў Беластоку (Польшча) беларускія студэнты праводзяць акцыю «Мяняем Дзіму на Сашу». «У турме мусяць сядзець сапраўдныя злачынцы, як Лукашэнка, а кіраваць краінаю павинны мужныя і адказныя патрыёты, накшталт Дашкевіча», -- заявілі арганізатары акцыі.

16 дня кожнага месяца ўжо цэлы год у многіх краінах Эўропы адбываюцца акцыі салідарнасьці з беларускімі палітвязьнямі й сем’ямі зьніклых апанэнтамі рэжыму Лукашэнкі. За сваю палітычную дзейнасьць дзясяткі чалавек адбываюць ў Беларусі розныя тэрміны пакараньня. Гэта Зьміцер Дашкевіч, Павал Севярынец, Артур Фінькевіч, Мікола Статкевіч, Аляксандар Казулін, Цімафей Дранчук, Андрэй Клімаў і іншыя. Да гэтага часу невядомымі застаюцца лёсы зьніклых апанэнтаў рэжыму – Зьмітра Завадзкага, Анатоля Красоўскага, Віктара Ганчара і Юрыя Захаранкі. У датычнасьці да іх забойстваў міжнароднай супольнасьцю падазраюцца тыя, хто сёньня стаіць начале беларускай дзяржавы.

Акцыя салідарнасьці 16 лістапада прысьвечана беспрэцэдэнтна жорсткаму прысуду маладому беларускаму палітыку Зьміцеру Дашкевічу - нядаўна хлопец быў асуджаны на 1,5 гады турэмнага зьняволеньня за кіраваньне хрысьціянска-дэмакратычным Маладым Фронтам, у чым рэжым Лукашэнкі знайшоў крымінальнае злачынства.