Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Калякіну адмоўлена ў рэгістрацыі ініцыятыўнай групы 10:28, 15/11/2006
Лідэру партыі камуністаў Беларускай (ПКБ) Сяргею Калякіну адмоўлена ў рэгістрацыі ініцыятыўнай групы па вылучэнні яго кандыдатам у дэпутаты Менгарсавета па Куйбышаўскай выбарчай акрузе сталіцы. Падставай для адмовы ў рэгістрацыі стала тое, што чацвёра з дзесяці сяброў ініцыятыўнай групы заявілі, што ўключаныя ў яе склад без іх папярэдняй згоды. Усе чацвёра – студэнты сталічных вну.
Як паведаміў БелаПАН С.Калякін, дадзеныя заявы былі зробленыя пасля таго, як на студэнтаў быў аказаны ціск з боку адміністрацыі вну. "Гэта яшчэ раз паказвае, што выбараў у Беларусі не будзе", – лічыць лідэр ПКБ.
Па словах лідэра камуністаў, улады ў першую чаргу спрабуюць блакаваць актыўнасць лідэраў апазіцыі, выкарыстоўваючы для гэтага ўсе наяўныя ў іх арсенале сродкі. Аднак, адзначыў палітык, падобныя дзеянні не змогуць выключыць лідэраў дэмакратычных сіл з перадвыбарнай кампаніі.
У аўторак стала вядома аб адмове ў рэгістрацыі ініцыятыўных груп лідэраў незалежнага прафсаюзнага руху Аляксандра Бухвоста і Генадзя Федыніча, а таксама намесніка старшыні Аб’яднанай грамадзянскай партыі Яраслава Раманчука. Раней не была зарэгістравана ініцыятыўная група лідэра АГП Анатоля Лябедзькі.
