Ірына Казуліна: Гутаркі пра шкоду галадання не дзейнічаюць на Казуліна :: Хартыя'97 :: Навiны

Сёння жонка экс-кандыдата ў прэзідэнты Аляксандра Казуліна наведала выпраўленчую ўстанову “Віцьба”, дзе адбывае пакаранне яе муж. Ірына Казуліна планавала сустрэцца з Сяргеем Скрабцом, каб даведацца з першых вуснаў пра інфармацыю аб стане здароўя А.Казуліна. Нягледзячы на тое, што раніцай яна ўжо ведала аб прыездзе С.Скрабца ў Менск, сваю паездку ў калонію яна не адмяніла. Як паведамляе прэс-служба экс-кандыдата ў прэзідэнты, у выпраўленчай установе Ірына Казуліна сустрэлася і размаўляла з намеснікам начальніка калоніі і з лекарам, які назірае за станам здароўя А.Казуліна.

“Лекар паведаміў мне, што ціск у А.Казуліна 110/70, вага 75 кг. Агульны аналіз крыві ў норме, аналіз мачы такі, які “павінен быць падчас галадання”. Біяхімічнага аналізу крыві А.Казулін не здаваў. Ад шпіталізацыі ён катэгарычна адмаўляецца. Рэгулярна прагульваецца на вуліцы. Кожны дзень лекар праводзіць з А.Казуліным лекцыі аб шкодзе галадання, але той яго не слухае, а часам і злуецца на такую назойлівасць”, – паведаміла Ірына Казуліна па тэлефоне.

Намеснік начальніка калоніі таксама кожны дзень пераконвае А.Казуліна спыніць галадоўку, аднак ніякіх станоўчых вынікаў ён у гэтым накірунку не дамогся.

Нагадаем, што сёння стала вядома, што за 27 дзён галадоўкі Аляксандр Казулін страціў 17 кілаграмаў вагі.