Сёння Дзень беларускай салідарнасці :: Хартыя'97 :: Навiны

16 лістапада – дзень салідарнасці з Беларуссю, якая змагаецца. У нашай краіне і ў шмат якіх краінах свету людзі выйдуць сёння на плошчы сваіх гарадоў з запаленымі свечкамі ў памяць выкрадзеных і забітых у Беларусі лідэрах апазіцыі і журналістах, у знак салідарнасці з палітычнымі зняволенымі, з усімі, хто змагаецца за свабоду і дэмакратыю ў Беларусі.

Ініцыятыва праводзіць Дні салідарнасці нарадзілася пасля таго, як 16 верасня 2005 года, у гадавіну знікнення віцэ-спікера Вярхоўнага Савета 13 склікання Віктара Ганчара і бізнэсмэна, грамадскага дзеяча Анатоля Красоўскага, міліцыя разагнала акцыю ў памяць зніклых і адняла ў яе ўдзельнікаў партрэты зніклых палітыкаў (людзі трымалі ў руках таксама партэты выкрадзеных у Беларусі экс-міністра ўнутраных справаў Юрыя Захаранкі і журналіста Зміцера Завадскага) і нацыянальныя сцягі. У той дзень моладзевы лідэр Мікіта Сасім падняў над галавой джынсавую кашулю як сымбал супраціву дыктатуры.

З таго часу акцыі салідарнасці праводзяцца ў Беларусі і па ўсім свеце 16 дня кожнага месяца. Сотні тысяч беларусаў і сяброў нашай краіны ва ўсім свеце ў 20:00 запальваюць у сваіх вокнах свечкі Свабоды, праводзяць вулічныя акцыі салідарнасці, павязваюць джынсавыя і бела-чырвона-белыя стужкі на сваёй вопратцы, удзельнічаюць у флэш-мобах і Інтэрнэт-акцыях. У храмах па ўсім свеце праходзяць набажэнствы за беларускіх палітвязняў, зя сем`і зніклых апазіцыянераў, за ўсіх, хто змагаецца за свабоду і дэмакратыю ў Беларусі.

Акцыі салідарнасці адбудуцца сёння ў Вашынгтоне, Варшаве, Любліне, Кракаве, Беластоке, Познані, Вроцлаве, Кіеве, Санкт-Петярбурзе, Бруселі, Стакгольме і шматлікіх іншых гарадах і краінах.