У Беластоку арыштавалі Лукашэнку (Фота) :: Хартыя'97 :: Навiны

50 чалавек прыйшлі 16 лістапада да беларускага консульства ў Беластоку, каб выказаць сваю падтрымку арыштаваным палітыкам й семьям зьніклых апанэнтаў рэжыму Лукашэнкі. Чарговая акцыя салідарнасьці, арганізаваная беларускімі студэнтамі, прайшла ў выглядзе тэатралізаванага пэрфомансу, падчас якога імправізаваны Аляксандар Лукашэнка быў арыштаваны уласнай аховаю, а малады палітык Зьміцер Дашкевіч вызвалены з турмы па патрабаваньні грамадзкасьці.

Пасьля заканчэньня пэрфомансу яго удзельнікі сталі са сьвечкамі й партрэтамі палітвязьняў Паўла Севярынца, Артура Фінькевіча, Міколы Статкевіча, Аляксандара Казуліна, Цімафея Дранчука, Андрэя Клімава і іншых насупраць беларускага консульства і патрабавалі неадкладнага вызваленьня палітвязьняў.

Гаворыць адзін з арганізатараў акцыі Барыс Гарэцкі: “У гэты дзень ужо цэлы год запар у многіх краінах Эўропы адбываюцца акцыі салідарнасьці з беларускімі палітвязьнямі й сем’ямі зьніклых апанэнтамі рэжыму Лукашэнкі. За сваю палітычную дзейнасьць дзясяткі чалавек адбываюць ў Беларусі розныя тэрміны пакараньня. Таму сёньня мы прыйшлі да беларускага дыпляматычнага прадстаўніцтва каб памяняць Дзіму на Сашу, бо лічыім, што ў турме мусяць сядзець сапраўдныя злачынцы, як Лукашэнка, а кіраваць краінаю – мужныя і адказныя патрыёты накшталт Дашкевіча”.

Удзельнік акцыі салідарнасьці Аляксей Трубкін дадае: “Нажаль, сёньня мы не можам працягваць адукацыю на Радзіме і вымушаныя вучыцца па-за межамі сваёй краіны. Але нават тут мы не забывем пра сваіх сяброў і паплечнікаў, якіх перасьледуе рэжым Лукашэнкі, штомесечна арганізуем акцыі салідарнасьці і выказваем сваю падтрымку асуджаным калегам”.

Акцыі салідарнасьці з Беларусьсю адбыліся сёньня таксама ў Варшаве, Любліне, Кракаве, Познані, Уроцлаве, Гданьску й Лодзі.