Станіслава Пачобута арыштавалі на пяць сутак. Ён абвясьціў галадоўку :: Хартыя'97 :: Навiны

Актывіста Саюза палякаў Беларусі Станіслава Пачобута сёньня арыштавалі на пяць сутак, і ён адразу абвясьціў галадоўку, паведаміла “Радыё Свабода”. Яго затрымалі ўчора ўвечары перад акцыяй салідарнасьці і даставілі ў Ленінскі райаддзел міліцыі Гродна. На актывіста склалі пратакол за дробнае хуліганства паводле артыкула 156 КаАП і пакінулі нанач за кратамі.

Судзьдзя Дзьмітры Мацеюк не згадзіўся выслухаць семярых сьведкаў з боку Станіслава Пачобута. Сьведкамі ў судзе былі толькі міліцыянты. Нікому іншаму прысутнічаць на разглядзе справы спадар Мацеюк не дазволіў.

Сам Станіслаў Пачобут пасьпеў расказаць, што ўчора група моладзі мелася запаліць у цэнтры Гродна сьвечкі з нагоды Дня салідарнасьці. Зрабіць гэта не атрымалася, бо зьявіліся міліцыянты, затрымалі яны толькі аднаго Станіслава Пачобута.

“Потым я даведаўся, што спраўляў нейкія патрэбы ў публічным месцы. Але было відавочна адразу, што гэта правакацыя. Проста чалавек падбег, паказаў на мяне пальцам, і мяне затрымалі ”, -- расказаў актывіст СПБ.

Станіслаў Пачобут сказаў, што супрацоўнік міліцыі, які кіраваў затрыманьнем, затрымліваў яго некалькі разоў раней.

Папярэднім разам Станіслава Пачобута затрымлівалі ў сакавіку на Кастрычніцкай плошчы ў Менску, тады яго арыштавалі на 10 сутак і зьмясьцілі ў жодзінскую турму.