Валерыя Красоўская: Забойцы бацькі непакараныя :: Хартыя'97 :: Навiны

"Менск-Варшава -- супольная справа" -- гэткім лёзунгам распачаўся ў Варшаве дзень салідарнасьці зь беларускімі палітвязьнямі ды зьніклымі апанэнтамі ўладаў. Арганізаваў акцыю "Зьвяз у падтрымку дэмакратыі ў Беларусі". Удзел бралі палякі ды беларусы – каля сотні чалавек. Усё пачалося ў цэнтры Варшавы пад помнікам Дэ Голя, дзе мінакам раздавалі ўлёткі пра акцыю салідарнасьці і пра лёс Зьмітра Дашкевіча, асуджанага на паўтары гады зняволеньня за "ўдзел у незарэгістраванай арганізацыі ".

Потым удзельнікі расьцягнуліся абапал вуліцы Новы Сьвят. Маніфэстанты трымалі зьнічкі, бел-чырвона-белыя сьцягі ды партрэты Зьмітра Дашкевіча. Праз цэнтральныя вуліцы калёна дайшла да Замкавага Пляцу, дзе арганізатары паказалі фільм Паўла Шэрэмэта "Дзікае паляваньне-2". Фільм праецыраваўся на аглядную вежу на Замкавым пляцы, паведаміла “Еўрапейскае радыё для Беларусі”.

У акцыі ўдзельнічала Валерыя Красоўская, дачка зніклага ў Беларусі 16 верасьня 1999 года грамадскага дзеяча Анатоля Красоўскага.

"Я б хацела сказаць, што значыць для мяне панятак "салідарнасьць". Імя злачынцаў, які прычыніліся да гвалтоўнага знікненьня, а магчыма да забойства Віктара Ганчара, Анатоля Красоўскага, Юрыя Захаранкі й Зьмітра Завадзкага, вядомыя ўсяму сьвету. Але замест пакарання злачынцы працягваюць беспакарана рабіць зло. Жыць і ведаць, што той, хто адправіў твайго бацьку на сьмерьць і застаўся непакараны - гэта пекла. Толькі вашая салідарнасьць падтрымлівае мяне. Я вельмі расчуленая тым, што сёньня вы тут. Сябры, толькі вера падтрымлівае мяне. Вера ў трыюмф правасудзьдзя. Чакаць засталося нядоўга. Усё залежыць ад нашае з вамі салідарнасьці", -- заявіла Валерыя Красоўская.