Расея супраць павелічэння транзіту казахскай нафты ў Беларусь :: Хартыя'97 :: Навiны

Расея не дазволіла павялічыць пастаўкі казахстанскай нафты ў Беларусь чыгуначным транспартам у мэтах загрузкі Наваполацкага прадпрыемства па транспарце нафты “Дружба”, паведамляе ПРАЙМ-ТАСС. Разглядалася магчымасць паставак нафты з Казахстана чыгуначным транспартам да Наваполацка, а пасля па трубе ў Літву, на Мажэкяйскі НПЗ. Аднак расейскі бок паведаміў аб тэхнічнай немагчымасці рэалізаваць гэтую прапанову з прычыны перагрузкі сваёй чыгуначнай сістэмы.

Эканамічная сітуацыя на Наваполацкім прадпрыемстве па транспарце нафты “Дружба” у апошнія месяцы значна пагоршылася, яго рэнтабільнасць знізілася да адмоўнага ўзроўня.

Транзіт расейскай нафты па наваполацкім нафтапровадзе “Дружба” у накірунку Літвы не здзясняўся пасля аварыі, якая здарылася на расейскім участку нафтапровада 29 ліпеня 2006 года. Пакуль невядома, калі Расея адновіць аб’ёмы транзіту ў бок Літвы і ці мае намер яна гэта рабіць наогул.

Раней Наваполацкае прадпрыемства “Дружба” перапампоўвала нафту таксама і ў Латвію, але са студзеня 2003 г. транзіт расейскай нафты ў гэтым накірунку быў цалкам спынены. У выніку наваполацкі натаправод у гэтым накірунку быў і загружаны толькі на 40%, а пасля аварыі ён наогул не працуе.

Па дадзеных Мінстата, транспартоўка нафты па беларускай нафтаправоднай сістэме ў 2005 г. павялічылася на 3,4% да 106,8 млн.т., у тым ліку транзіт павялічыўся на 4,2% да 87,6 млн.т.

Наваполацкае прадпрыемства па транспарце нафты “Дружба” транспартавала 23,432 млн.т. (+4,4%). На нафтаперапрацоўчы завод “Нафтан” у 2005 г. пастаўлена 8,649 млн.т. (паніжэнне на 0,7%). Транзітам на Мажэйкяй, Буцінге (Літва) наваполацкае прадпрыемства прапампавала 14,783 млн.т. (+6,7%). У накірунку латвійскага порта Вентспілс транзіт не здзяйсняўся.

Гомельскае прадпрыемства транспарта нафты “Дружба” у 2005 г. павялічыла перапампоўку нафты на 3,2% да 83,381 млн.т. У тым ліку на Мазырскі НПЗ прадпрыемства транспартавала 9,476 млн.т. нафты (+0,8%). Транзітам праз гомельскае прадпрыемства ў 2005 г. прапампавана 72,898 млн.т. (+3,7%): у накірунку Адамава (Польшча) 49,068 млн.т. (+1,9%), у накірунку Брады (Украіна) 23,829 млн.т. (+17,6%).