Маці салдата, які загінуў: «Я другога сына ў войска не пушчу» :: Хартыя'97 :: Навiны

Няшчасце, якое адбылося 16 лістапада ў Гародненскай вобласці, адно з самых трагічных у гісторыі беларускага войска. Прэс-служба Міністэрства абароны паведаміла, што на Гожскім палігоне падчас выканання планавых навучальна-баявых стрэльбаў вайскоўцамі 6-ай гвардзейскай асобнай механізаванай брыгады адбыўся разрыў баяпрыпасу. Чацвёра салдатаў атрымалі траўмы рознай ступені цяжкасці. Двое з іх памерлі. Гэта радавы Кулеша Аляксандр (1986 г.н.) і сяржант Ляўкевіч Віталь (1985 г.н.). Адзін з іх сканаў на месцы, другі – па дарозе ў шпіталь. Прапаршчык Н.А.Касянік і старэйшы лейтэнант Т.І.Шарадок атрымалі аскепкавыя раненні і зараз знаходзяцца ў рэанімацыі.

– У цяперашні час іх стан цяжкі, але пакуль больш-менш стабільны, – паведамілі нам у гародненскім вайсковым шпіталі.

– Ці ёсць небяспека для іх жыцця?

– Стан цяжкі, а прагнозы мы даваць не будзем. Спадзяемся, што ўсё скончыцца добра.

– Яны ў прытомнасці?

– Можна сказаць, што яны былі ў прытомнасці.

Віталь Ляўкевіч быў прызваны на службу ўлетку 2005 года, пасля заканчэння берасцейскага тэхнікума чыгуначнага транспарту.

– Ён павінен быў вярнуцца дадому ў снежні, да Новага года, – кажа яго маці. – Два месяца таму ў Віталі памёр бацька, яму было 44 гады. Сын прыязджаў на пахаванне. Майму малодшаму сыну – 17 гадоў. У войска я Жэню не пушчу.

– У нас усе ў шоку, – сказала суседка бацькоў Віталя. – Ніяк апамятацца не можам. Хлопчык быў такі, што мы нарадавацца не маглі... Кажуць, яго ў дэпо ўжо чакалі, ведалі, што адмысловец будзе добры.

Мінабароны паведаміла, што падзяляе гора родных і дапаможа сем’ям. Камісія Мінабароны сумесна з ваеннай пракуратурай вядзе расследаванне. Па папярэдняй версіі, чыннікам здарэння з`явілася “парушэнне вайскоўцамі бяспечных умоў падчас выканання стрэльбаў”.

ШТО ГАВОРЫЦЬ ЗАКОН

У законе “Аб статусе вайскоўцаў” гаворыцца:

– У выпадку гібелі вайскоўца страхавая сума выплачваецца сям’і таго, хто загінуў, у памеры 250 базавых велічынь (1 базавая – 31000 рублёў. Рэд.).

Калі ў выніку ранення атрыманая інваліднасць, то выплачваюцца страхавыя сумы:
інваліду I групы – 100 базавых велічынь;
інваліду II групы – 75 базавых велічынь;
інваліду III групы – 50 базавых велічынь.

Калі вайскоўца атрымаў падчас выканання абавязкаў ваеннай службы цяжкае раненне, якое не прывяло да інваліднасці, яму выплачваецца страхавая сума ў памеры 10 базавых велічынь, лёгкае раненне – 5 базавых велічынь.

Андрэй АСМАЛОЎСКІ, «КП в Беларуси»