Лукашэнка хоча кампенсаваць рост цэнаў на газ за рахунак Масквы? :: Хартыя'97 :: Навiны

Аляксандр Лукашэнка, здаецца, знайшоў тактыку перамоў па цане на расейскі газ, які пастаўляецца ў краіну, піша сёння газета “Время новостей”. Тыдзень таму адразу пасля сустрэчы ў Крамлю з Уладзімірам Пуціным ён сцвярджаў, што не чуў аб намеры “Газпрома” падвысіць кошт да 200 дол. за тыс. кубаметраў, і выяўляў упэўненасць, што гаспадарчыя суб`екты (“Газпром” і “Белтрансгаз”) дамовяцца. У мінулую пятніцу падчас сустрэчы з працаўнікамі Бабруйска беларускі кіраўнік заклікаў свой урад кампенсаваць будучыя страты за рахунак Расеі. “Адкуль Беларусі ўзяць адзін мільярд даляраў у выпадку, калі Расея ў значнай ступені падвысіць кошт за расійскі газ? – абураўся спадар Лукашэнка. – Мы не зможам перакласці гэта на плечы насельніцтва і прадпрыемстваў. Мы павінны ўвесці кампенсацыйныя схемы і прапанаваць Расеі кампенсаваць гэтыя страты. Калі, напрыклад, гэта было бясплатна для Расеі, то зараз – плаціце”.

Відавочна, Лукашэнка ўжо ведаў, што гендырэктар “Белтрансгаза” Зміцер Казакоў, які ў пятніцу быў на прыёме ў кіраўніка “Газпрома” Аляксея Мілера, ізноў пачуў расейскую пазіцыю аб еўрапейскім падыходзе да фармавання кошту. “Нашай мэтай на перамовах з`яўляецца пераход на рынкавыя цэны ў пастаўках газу ў Беларусь”, – працытавалі спадара Мілера ў прэс-службе. Акрамя таго, кіраўнікі “гаспадарчых суб`ектаў”, якім трэба будзе дамовіцца аб тым, колькі Менск будзе плаціць за газ, пагаварылі аб ходзе незалежнай ацэнкі рынкавага кошту аб`ектаў газатранспартнай сістэмы Беларусі. Крыніца ў беларускім мінэнерга паведаміла Інтэрфаксу, што ацэншчык ABN Amro, верагодней за ўсё, ужо ў пачатку снежня прадставіць вынікі ацэнкі 50% акцый “Белтрансгаза”, на якія прэтэндуе расейскі канцэрн. Гэта значыць дамовіцца аб умовах пагаднення да канца года, а значыць, і забяспечыць у выніку пагаднення дадатковы прыбытак у беларускі бюджэт для змякчэння росту цэнаў на газ наўрад атрымаецца.

Таму ўмоўны “мільярд” спадар Лукашэнка хоча пашукаць за конт павелічэння пабораў з расейскага ўрада і кампаній. Ён згадаў аб тым, што праз беларускую тэрыторыю штогод праходзіць да 100 млн тон транзітных грузаў у Расею і з Расеі. Не забыў ён і пра расейскія вайсковыя базы, якія знаходзяцца ў Беларусі. “Беларусь з`яўляецца фарпостам Расеі на Захадзе. Мы не адмаўляемся абараняць Расею на гэтым накірунку. А гэта дорага каштуе. Расейскія вайсковыя аб`екты размешчаныя на тэрыторыі Беларусі таксама бясплатна” , – сказаў спадар Лукашэнка. Дарэчы, аналагічныя заявы Кіева падчас газавага гандлю не перайшлі ў рэальныя дзеянні, і сур`ёзнага перагляду тарыфаў не адбылося.

Пагрозы павялічыць плату за што-небудзь расейскае Аляксандр Лукашэнка ўзмацніў заклікам да моднага цяпер дыверсіфікавання паставак энергарэсурсаў. “Расейцы заўсёды былі роднымі і блізкімі людзьмі, але якімі бы блізкімі яны ні былі, мы не можам залежыць па энерганосьбітах ад адной краіны”, – адзначыў беларускі кіраўнік. І адразу прапанаваў прытрымлівацца прыкладу ідэалагічна чужой яму Амерыкі: “Або здабываць яе (нафту – Рэд.) у іншай краіне і прадаваць на сусветных рынках, або, як робяць амерыканцы, танкерамі дастаўляць у парты, а пасля па чыгунцы або трубаправодным транспартам пастаўляць яе ў Беларусь”.