Міліцыя адмовілася расследваць апаганенне фашыстамі будынка царквы :: Хартыя'97 :: Навiны

Менскай царкве “Новае жыццё” Аб’яднання суполак хрысціянаў поўнага Евангелля ў Рэспубліцы Беларусь адмоўлена ва ўзбуджэнні крымінальнай справы па факце апаганення будынка суполкі.

Як паведаміў БелаПАН юрыст царквы Сяргей Луканін, начальнік гарадскога аддзялення № 1 Маскоўскага РУУС сталіцы Барыс Тупіца кваліфікаваў дзеянні вандалаў па артыкуле 218 Крымінальнага кодэкса Беларусі (наўмыснае знішчэнне або пашкоджанне маёмасці), паводле якога крымінальная адказнасць наступае, калі прынесеная шкода перавышае 40 базавых велічынь. “Аднак у сваёй іскавой заяве мы казалі пра апаганенне будынка храма, што кваліфікуецца па артыкуле 341 КК (апаганенне будынкаў і псаванне маёмасці), па якім крымінальная адказнасць наступае незалежна ад сумы прынесенай шкоды”, – адзначыў юрыст. Ён мяркуе, што пастанова, прынятая супрацоўнікамі праваахоўных органаў, гаворыць аб іх некампетэнтнасці альбо аб нежаданні займацца гэтай справай. “Мы збіраемся абскардзіць пастанову працаўнікоў міліцыі ў пракуратуры Маскоўскага раёна”, – заявіў С.Луканін.

Нагадаем, у ноч на 1 лістапада актывісты незарэгістраванай у Беларусі нацыянал-бальшавіцкай партыі апаганілі будынак царквы: аблілі чорнай фарбай паўднёва-заходні кут будынка, а за біблейскім выслоўем “Хто спустошыць храм Божы, таго пакарае Бог” чырвонай фарбай напісалі тэкст “Не таталітарным сеткам”, намалявалі эмблему партыіі нацыянальных бальшавікоў і абрэвіятуру НБП.