Пасля 32 дзён галадоўкі Казуліна начальнік калоніі сыйшоў на адпачынак :: Хартыя'97 :: Навiны

Начальнік калоніі “Віцьба-3” Віталь Агністыкаў сыйшоў на адпачынак. Аб гэтым прэс-службе АГП паведамілі інфармацыйныя крыніцы. На фоне месячнай палітычнай галадоўкі пратэсту экс-кандыдата ў прэзідэнты Аляксандра Казуліна адпачынак начальніка калоніі выклікае шмат пытанняў. Нагадаем, што палітвязень галадае 32 дні, патрабуючы разгляду сітуацыі ў Беларусі ў Радзе Бяспекі ААН.

“Верагодна, ён мяркуе, што такім чынам ён не будзе прыцягнуты да адказнасці за лёс Казуліна, – лічыць юрыст Алег Воўчак. – Магчыма, у яго ўжо ёсць інфармацыя, што ў Казуліна пагоршылася здароўе. Або пачнуць сілком уліваць у страўнік ежу. Арганізм па-рознаму можа зрэагаваць – Казулін можа памерці, а можа стаць інвалідам”.

У гэтай сітуацыі, звяртае ўвагу праваабаронца, вышэйшае кіраўніцтва не павінна было адпускаць Агністыкава. “Таму ўсё выглядае вельмі дзіўна, – адзначыў у размове з прэс-службай АГП Алег Воўчак. – Казулін галадае больш за 30 дзён. І мы разумеем, што зараз кожны дзень вырашаецца пытанне аб яго жыцці. Начальнік калоніі абавязаны быць на працоўным месцы да канца галадоўкі. Зыходзячы з усіх, у тым ліку і маральных аспектаў”. Як падкрэсліў Алег Воўчак, у любым выпадку ўсю адказнасць за Казуліна будзе несці Віталь Агністыкаў.

Не выпадковым яго сыход на адпачынак лічыць і апазіцыйны палітык Сяргей Скрабец, які быў вызвалены гэтымі днямі. “Агністыкаў не хоча адказваць за тое, што адбываецца сёння ў калоніі, – сказаў у каментары прэс-службе АГП экс-вязень “Віцьбы-3”. – Калонія для злачынцаў стала калоніяй для палітычных зняволеных. І Агністыкаў ператварыўся з чалавека, які павінен служыць Радзіме і народу, у пераследвальніка дэмакратыі і свабоды”.

Выкананне абавязкаў начальніка калоніі на тэрмін адпачынку Віталя Агністыкава ўскладзенае на яго намесніка па рэжыму Руслана Прыймака.