Журналіста сайта «Каўказ-цэнтр» прысудзілі да 5 гадоў зняволення :: Хартыя'97 :: Навiны

Бутырскі суд Масквы прызнаў вінаватым і прысудзіў галоўнага рэлактара бюлетэня “Радыкальная палітыка” і журналіста сайта “Каўказ-цэнтр” Барыса Стамахіна да пяці гадоў зняволення ў калоніі агульнага рэжыму за ўзбуджэнне рэлігійнай нянавісці, здзейсненае публічна з выкарыстаннем СМІ, перадае “Інтэрфакс”.

У абвінаваўчым заключэнні адзначаецца: “Адлюстроўваючы ў сваіх публікацыях звесткі, якія адбываюцца ў Расеі і якія звязаныя з баявымі дзеяннямі ў Чачэнскай рэспубліцы, а таксама тэракты, што адбыліся на тэрыторыі РФ, Стамахін ухваляў злачынствы тэрарыстаў, дзеянні якіх былі накіраваныя на знішчэнне расейскага народа, як нацыі”.

Пракурор Зміцер Кулакоў заявіў, што задаволены вынесеным рашэннем. Ён сказаў, што пытанне абскарджання прысуду з боку пракуратуры будзе вырашана пасля таго, як ён вывучыць пратаколы судовага паседжання і вынесенага рашэння. Выносячы рашэнне, суд улічыў змякчальныя абставіны – інваліднасць падсуднага і яго маці.

Раней падсудны прасіў суд падчас вынясення прысуду ўлічыць як змякчальную акалічнасць той факт, што ён з`яўляецца інвалідам і дрэнна сябе адчувае, а таксама на яго апецы знаходзіцца маці, якая таксама з`яўляецца інвалідам. Стамахін падкрэсліў, што ў судзе “вырашаецца лёс цэлай сям’і”.

У сваю чаргу маці падсуднага заявіла, што збіраецца абскардзіць прысуд, бо лічыць яго пазапраўным.

Раней пракуратура Поўнача-Усходняй акругі сталіцы прыцягнула журналіста да адказнасці па двух артыкулах КК: арт. 282 (узбуджэнне нянавісці альбо варожасці, а роўна зневажанне чалавечай годнасці) і арт. 280 (публічныя заклікі да ажыццяўлення экстрэмісцкай дзейнасці з выкарыстаннем СМІ). Таксама Кулакоў прасіў забараніць Стамахіну пасля вызвалення на працягу трох гадоў займацца журналісцкай дзейнасцю.

Нагадаем, што 15 лістапада Кулакоў выступіў са зваротам да суду, у якім папрасіў суд прысудзіць журналіста сайта “Каўказ-цэнтр” да 7 гадоў зняволення. “Прымаючы да ўвагі грамадскую небяспеку здзейсненага злачынства, лічу, што выпраўленне Стамахіна магчыма толькі ва ўмовах рэальнага пазбаўлення свабоды”, – сказаў пракурор, падчас выступу ў спрэчках у Бутырскім судзе Масквы.

Крымінальная справа была ўзбуджаная пракуратурай у снежні 2003 года, а затрыманы Стамахін быў толькі ў сакавіку 2006 года, бо хаваўся ад следства.