Большасць краінаў ЕЗ выступае за пазбаўленне Беларусі гандлёвых ільгот :: Хартыя'97 :: Навiны

Пытанне аб пазбаўленні Беларусі гандлёвых ільгот у рамках Генеральнай сістэмы прэферэнцый абмяркоўвалася на чарговым паседжанні Камітэта па прэферэнцыях Еўрапейскага Саюза 17 лістапада. Як паведамляе www.praca-by.info, прадстаўнікі краінаў, якія маюць кваліфікаваную большасць галасоў, падтрымалі прапанову Еўрапейскай Камісіі прыпыніць дзеянне гандлёвых прэферэнцый для Беларусі, урад якой парушае правы прафсаюзаў у краіне.

Італія, якая раней устрымлівалася, гэтым разам прагаласавала “за”. Усяго 18 краін-сяброў ЕЗ падтрымалі прапанову Еўрапейскай Камісіі. Устрымаліся – Чэхія і Славакія. Супраць галасавалі Польшча, Літва, Латвія і Кіпр. Грэцыя не ўдзельнічала ў галасаванні, і паведаміць аб сваім рашэнні на гэтым тыдні. Наступная працоўная сустрэча Камітэта па прэферэнцыях ЕЗ адбудзецца 5 снежня.

Нагадаем, у жніўні 2005 Еўрапейскі Звяз пачаў працэдуру прыпынення гандлёвых прэферэнцый у дачыненні імпарту з Беларусі ў краіны ЕЗ шэрагу тавараў, уключаючы тэкстыльныя вырабы, драўніну і нафтапрадукты. Чыннікам сталі сістэматычныя парушэнні ўрадам нашай краіны правоў прафсаюзаў. Еўракамісія падала Беларусі шэсць месяцаў для таго, каб прывесці заканадаўства ў адпаведнасць са ўзятымі абавязальніцтвамі, і яшчэ восем месяцаў – для выканання 12 рэкамендацый Міжнароднай арганізацыі працы (МАП) па ліквідаванні парушэнняў. На папярэдняй сустрэчы Камітэта па прэферэнцыях ЕЗ у кастрычніку было вырашана вярнуцца да абмеркавання беларускага пытання пасля завяршэння працы 297 сесіі Адміністрацыйнай Рады МАП.