Прадпрымальнікі маюць намер правесці мітынг пратэсту :: Хартыя'97 :: Навiны

150 дэлегатаў з усіх рэгіёнаў Беларусі прынялі ўдзел 20 лістапада ў форуме “Прадпрымальнікі ў імя будучыні” у Менску. Беларускія прадпрымальнікі занепакоеныя ўмовамі іх працы, якія пагаршаюцца, і маюць намер правесці 27 лістапада мітынг.

Як растлумачыў “Нямецкай хвалі” арганізатар форума – старшыня грамадскага аб’яднання прадпрымальнікаў “Перспектыва” Анатоль Шумчанка, галоўная мэта правядзення дадзенага мерапрыемства:

“Усталяванне дыялогу паміж уладамі і прадпрымальнікамі. На сённяшні дзень дыялог у нас адсутнічае, а прысутнічае маналог. Гэта значыць прадпрымальнікі, законапаслухмяныя грамадзяне, плацяць падаткі, слухаюць, што ўлада ім гаворыць. Але калі закранаюцца праблемы прадпрымальнікаў – іх улада не жадае слухаць. Таму задача гэтага форума – быць пачутымі і зразуметымі ва ўласнай краіне”.

Па словах Шумчанкі, сёння ў прадстаўнікоў малога бізнэсу існуе тры асноўныя праблемы. Гэта – увядзенне маркіровачных знакаў на імпартны абутак, што можа амаль у два разы павялічыць яе цану, прыраўноўванне рознічнага гандлю парфумерыяй да оптавага і незразумеласць, якія правілы выплаты НДС -- падатка на даданы кошт, будуць дзейнічаць у 2007 годзе. Як адзначыў старшыня “Перспектывы”, прадпрымальнікі прапаноўваюць не вырашаць цяжкасці з напаўненнем бюджэту за іх рахунак, а сесці з урадам за стол перамоваў.

Як лічыць прадпрымальнік з Баранавічаў Аліна Гутарчык:

“Сённяшні форум дапаможа кожнаму з нас разабрацца ў першую чаргу, якія насамрэч умовы нашай далейшай працы і дапаможа іншымі вачыма, мы спадзяемся на гэта, нашаму ўраду зірнуць на тыя ўмовы, у якіх мы працуем”.

Разам з гэтым Анатоль Шумчанка дадаў:

“Мы хочам знайсці кампраміс. Прычым форум прадпрымальнікі праводзяць – яны паказваюць уладам, што мы пераходзім на новы цывілізаваны ўзровень дыялогу. Аднак калі нас будуць ігнараваць, то нам нічога не застанецца, як магчыма іншым чынам дастукацца да ўлады. Я хачу ўладам сказаць: “Лепш благі мір, чым добрая сварка”.

Але ці пачулі ўлады прадпрымальнікаў дзякуючы форуму – пакуль не вядома. Таму, па словах Шумчанкі, каб паказаць рашучасць у адстойванні сваіх інтарэсаў, прадпрымальнікі вырашылі правесці ў наступны панядзелак мітынг. Тым больш, што, як пажартаваў адзін з іх, у Беларусі каб быць пачутымі лепш правесці дрэнны мітынг, чым добры форум.