МАП разгледзіць беларускае пытанне ў сакавіку 2007 года :: Хартыя'97 :: Навiны

Адміністратыўная Рада Міжнароднай арганізацыі працы разгледзела меры, якія могуць быць распачатыя ўрадам Беларусі для выканання рэкамендацый Камісіі па расследаваннях МАП, зробленых у 2004 годзе. На 297-ай сесіі Адміністрацыйнай Рады, якая праходзіла ў Жэневе з 2 па 17 лістапада, было прынятае рашэнне ўключыць беларускае пытанне ў павестку наступнай сесіі вышэйшага кіруючага органа МАП у сакавіку 2007 года. Такое рашэнне, паведамляе www.praca-by.info, стала магчымым пасля перамоў прадстаўнікоў беларускага ўрада і МАП, якія адбыліся ў кастрычніку, падчас якіх была прадстаўленая інфармацыя аб выкананні некалькіх рэкамендацый.

Такім чынам, 9 кастрычніка, літаральна за тыдзень да візіту высокапастаўленых беларускіх службоўцаў у МАП, з`явілася паведамленне прэс-службы прэзідэнта аб роспуску Камісіі па рэгістрацыі і аб канцэпцыі новага закона «Аб прафсаюзах», паводле якой плануецца спрасціць працэдуру рэгістрацыі грамадскіх арганізацый. Як паведамляецца ў прэс-рэлізе, прысвечаным вынікам паседжання Адміністрацыйнай Рады МАП, ураду Беларусі было ў тэрміновым парадку прапанавана ўзаемадзейнічаць з МАП па пытанні планаваных змен у заканадаўстве дзеля таго, каб яны служылі выкананню рэкамендацый і не супярэчылі Канвенцыям МАП аб свабодзе асацыяцыі і аб праве на вядзенне калектыўных перамоваў. У сакавіку 2007 Адміністрацыйная Рада вернецца да разгляду беларускага пытання ў святле новага развіцця сітуацыі і ацэнкі, якую дадуць кантралюючыя органы МАП.