Беларускі рэжым павінен вызваліць яшчэ 12 палітвязняў :: Хартыя'97 :: Навiны

Два палітычных зняволенных – былы дэпутат, лідэр групы “Рэспубліка” Сяргей Скрабец і лідэр грамадзянскай кампаніі па назіранні за выбарамі Мікалай Астрэйка – выйшлі гэтымі днямі на волю. Сяргей Скрабец быў амніставаны праз паўтары гады зняволення ў Віцебскай выпраўленчай калоніі. Мікалай Астрэйка пасля 9 месяцаў зняволення ў Шклоўскай калоніі ўзмоцненага рэжыму атрымаў права на “змякчэнне” пакарання і зараз адбывае выпраўленчыя працы. Аднак вызваленне двух палітычных зняволеных не гаворыць пра тое, што беларускія ўлады пачулі патрабаванні міжнароднай супольнасці. Напярэдадні да аднаго з паловай гадоў зняволення быў прысуджаны лідэр “Маладога Фронту” Зміцер Дашкевіч. Усяго ў беларускіх турмах сёння знаходзяцца 12 палітвязняў.

Сёння ў Беларусі пазбаўленыя волі па палітычных матывах:

Аўтуховіч Мікалай, лідэр прадпрымальніцкага руху
Дашкевіч Зміцер, лідэр “Маладога Фронту”
Дранчук Цімафей, сябар грамадзянскай ініцыятывы па назіранні за выбарамі
Клімаў Андрэй, дэпутат Вярхоўнага Савета 13 склікання
Казулін Аляксандр, экс-кандыдат у прэзідэнты Беларусі
Крук Іван, актывіст Аб`яднанай грамадзянскай партыі
Лявонаў Юрый, актывіст прадпрымальніцкага руху
Разумаў Мікалай, актывіст прафсаюзнага руху
Севярынец Павел, моладзевы лідэр
Статкевіч Мікалай, лідэр Беларускай сацыял-дэмакратычнай партыі “Народная Грамада”
Фінькевіч Артур, моладзевы лідэр
Садоўская Кацярына, праваабаронца

Больш таго, пераслед у Беларусі апазіцыі і прадстаўнікоў грамадзянскай супольнасці працягваецца. У самы блізкі час не выключна ўзбуджэнне новых крымінальных спраў. У якасці падазроных у здзяйсненні крымінальных злачынстваў сёння знаходзяцца актывіст Саюза палякаў Беларусі Анджэй Лісоўскі, моладзевы лідэр Павал Красоўскі, грамадскі актывіст Павал Марозаў.