Барацьба з незалежнымі кандыдатамі: звальненні з працы, пагрозы, выключэнні з вну :: Хартыя'97 :: Навiны

На актывістаў кампаніі “За свабоду”, якія заявілі аб сваім жаданні балатавацца ў дэпутаты мясцовых Саветаў на выбарах, якія адбудуцца ў студзені 2007 года, па-ранейшаму аказваецца ціск. Як паведамілі прэс-цэнтру Хартыі’97 каардынатары кампаніі “За свабоду” па г.Менску, некалькіх актывістаў ужо пазбавіліся працы, на некаторых пачалі аказваць ціск супрацоўнікі КДБ. Студэнтам, якія збіраюць подпісы за вылучэнне дэмакратычных кандыдатаў у дэпутаты, пагражаюць выключэннем з вну.

Гэтымі днямі працы пазбавіліся актывісты кампаніі “За свабоду” Максім Плешчык і Максім Залескі. Плешчык быў звольнены з ААТ “Скоринина”, дзе ён працаваў пакавальшчыкам, а Залесскі з ІП “Планета игр”. Па словах актывістаў, у абодвух выпадках звальнення з прадпрыемстваў адбываліся па ўказцы “зверху”: кіраўніцтву прадпрыемстваў тэлефанавалі з адпаведных службаў і “раілі” звольніць апазіцыйна накіраваных супрацоўнікаў.

Сёння раніцай пагроза звальнення навісла і над слесарам-рамонтнікам Менскага аўтазавода Аляксандрам Дульчыкам. Кіраўніцтва прадпрыемства папярэдзіла Дульчыка, што ён “дарма” балатуецца ў дэпутаты.

Актывісту кампаніі “За свабоду” Алегу Клюшне сёння патэлефанаваў невядомы чалавек, прадставіўся супрацоўнікам КДБ і прапанаваў сустрэцца і “пагаварыць”. Калі ж Клюшня адмовіўся ад сустрэчы, супрацоўнік КДБ папярэдзіў, што будзе гутарыць з ім “праз кіраўніцтва прадпрыемства”.

Студэнта Сяргея К., які збіраў подпісы за вылучэнне Алега Клюшні кандыдатам у дэпутаты, гэтымі днямі выклікалі ў дэканат аднаго з факультэтаў Беларускага дзяржаўнага ўніверсітэту інфарматыкі і радыёэлектронікі і прыстрашылі выключэннем з універсітэта, калі ён не спыніць збор подпісаў.