Ярмошына: Абыйдземся без міжнародных назіральнікаў :: Хартыя'97 :: Навiны

Беларусь не будзе запрашаць на мясцовыя выбары міжнародных назіральнікаў. Гэта яшчэ раз пацвердзіла старшыня Цэнтрвыбаркама Лідзія Ярмошына ў інтэрв’ю, апублікаваным у сённішнім нумары газеты “Местное самоуправление”.

“Сусветная практыка ідзе па шляху незапрашэння міжнародных назіральнікаў на мясцовыя выбары. Наша дзяржава вырашыла не быць “белай варонай” сярод іншых краінаў і таксама не запрашае міжнародных назіральнікаў”, – сказала Л.Ярмошына. Акрамя таго, па словах кіраўніцы ЦВК, у Беларусі “няма праблем з нацыянальным назіраннем”. “Беларусь займае першае месца сярод краінаў СНД па колькасці суб’ектаў, якія маюць права накіроўваць нацыянальных назіральнікаў на выбарчыя ўчасткі”, – падкрэсліла Л.Ярмошына.

Яна адзначыла таксама, што выбарчая кампанія ў Беларусі праходзіць вельмі спакойна, ажывіцца яна толькі пасля таго, як пачнецца рэгістрацыя кандыдатаў (з 5 па 14 снежня), а таксама перыяд агітацыі. У пераважнай большасці акруг старшыня ЦВК не чакае асобай палітычнай барацьбы, паколькі ў іх адсутнічае канкурэнцыя кандыдатаў. “У Менску жа барацьба будзе назірацца ў любым выпадку, таму што там у выбарах удзельнічае досыць вялікая колькасць асоб, якія вядомыя ў нашай палітыцы”, – сказала Л.Ярмошына.