Ад Казуліна патрабуюць устаць на «шлях выпраўлення» :: Хартыя'97 :: Навiны

Скарга экс-кандыдата ў прэзідэнты Беларусі, палітвязня Аляксандра Казуліна, якая аспрэчвае правамернасць вынесенага яму судом Маскоўскага раёна Менска прысуду, будзе разгледжаная гарсудом да 30 лістапада.

Як паведамілі “Інтэрфаксу” у сераду ў канцылярыі Менскага гарсуда па крымінальных справах, паводле закона рашэнне па скарзе ў наглядным парадку прымае старшыня суду. У нагляднай скарзе, пададзенай прыкладна месяц таму, гаворыцца, што абарона лічыць рашэнне касацыйнай інстанцыі, якая адмовілася адмяніць прысуд суду Маскоўскага раёна Менска пазапраўным і неабгрунтаваным. “У скарзе абарона просіць прысуд адмяніць, справу спыніць за адсутнасцю складу злачынства", – сказаў адвакат А.Казуліна Ігар Рынкевіч.

Як паведамілі “Інтэрфаксу” у выпраўленчай калоніі (ВК) нумар 3 у Віцебску, дзе адбывае пакаранне А.Казулін, ён “адмовіўся напісаць заяву аб тым, што ён гатовы стаць на шлях выпраўлення, знаходзячыся ў месцах пазбаўлення волі”. У сувязі з гэтым у калоніі сказалі, што па існуючым заканадаўстве “абсалютна ўсім асуджаным, якія адбываюць пакаранне ў выпраўленчых установах рэспублікі, даецца права напісаць заяву аб тым, што яны гатовыя стаць на шлях выпраўлення, і гэта дае ім шанец на змякчэнне пакарання”.

І.Рынкевіч адзначыў, што “А.Казулін не лічыць сябе вінаватым, таму не напісаў такую заяву”. Адвакат паведаміў, што дэпартамент выканання пакаранняў МУС матываваў адмову яму ў сустрэчах з А.Казуліным тым, што “побач з асуджаным увесь час знаходзіцца лекар і кантралюе стан здароўя асуджанага”.

А.Казулін быў асуджаны 13 ліпеня цяперашняга года па арт. 339 ч. 2 і арт 342 ч. 1 УК Беларусі (Злоснае хуліганства і арганізацыя групавых дзеянняў, груба парушаючых грамадскі парадак, альбо актыўны ўдзел у іх). Ён прысуджаны да 5,5 гадоў зняолення з адбываннем пакарання ў калоніі агульнага рэжыму. З 20 кастрычніка 2006 года А.Казулін пачаў галадоўку.