Лукашэнка паабяцаў беларусам катастрафічны год :: Хартыя'97 :: Навiны

Аляксандр Лукашэнка прагназуе, што наступны год у сувязі з падвышэннем цэнаў на расейскі газ будзе вельмі цяжкім для яго краіны. Па яго меркаванні, выхадам з цяжкага становішча можа быць павелічэнне вытворчасці і продажаў беларускіх тавараў за мяжой. “Гэта будзе вельмі цяжкі год, будзе катастрафічна цяжка. Нам, каб выжыць у гэтай цяжкай сітуацыі і быць багацей, трэба больш вырабляць і прадаваць. А гэта найжорсткая канкурэнцыя, і мы ў кагосьці, груба кажучы, павінны адабраць “кавалак хлеба і ўзяць нечы рынак”, – заявіў Лукашэнка ў сераду падчас паседжання ўрада краіны.

Кажучы пра пошукі новых крыніц энерганосьбітаў, Лукашэнка заклікаў кіраўніцтва кабінета міністраў, а таксама ўсе профільныя ведамствы “працавць у накірунку Венесуэлы, Ірана, Азербайджана”. “Гэта трэба зрабіць, калі мы жадаем захаваць краіну для нашых дзяцей, суверэнітэт і незалежнасць, каб нас кожны дзень, месяц, кожны год не ставілі да сценкі, не распіналі і не крычалі: “давай плаці за газ і нафту”, – лічыць беларускі кіраўнік.

Як вядома, адзначае Lenta.ru, у 2006 годзе Беларусь купляе расейскі газ па 46,68 даляраў за тысячу кубаметраў. Аб тым, што расейскі бок прапаноўвае Менску ў 2007 годзе купляць газ ужо па 200 даляраў, у пачатку лістапада заявіў амбасадар Расеі ў Беларусі Аляксандр Сурыкаў, які ўдакладніў, што падвышэнне цэнаў будзе залежыць ад пагаднення па продажу “Газпрому” паловы нацыянальнай кампаніі “Белтрансгаз”. Пазней “Газпром” пацвердзіў словы Сурыкава.

Аднак пакуль Масква і Менск не дасягнулі дамоўленнасці па пагадненні з “Белтрансгазам”.