Беларускаму аб’яднаньню студэнтаў Польшчы – 25 гадоў :: Хартыя'97 :: Навiны

Сёньня ў Беластоку пачалося сьвяткаваньне 25-годзьдзя з часу заснаваньня Беларускага аб`яднаньня студэнтаў Польшчы – адной з найбольш актыўных арганізацыяў беларускай меншасьці ў Польшчы, паведамляе “Радыё Свабода”.

Хто хаця б аднойчы быў на фэстывалі музыкі маладой Беларусі “Басовішча”, бадай, ніколі не забудзе атмасфэры гэтага фэстывалю, які свой назоў атрымаў ад абрэвіятуры назвы Беларускае аб`яднаньне студэнтаў – БАС, адсюль і “Басовішча”.

Але БАС – гэта ня толькі сьвята беларускага року ў Гарадку.

“Мы працуем увесь год. Гэта ня толькі канцэрты, але і паказы фільмаў, арганізацыя сустрэчаў, супрацоўніцтва зь іншымі студэнцкімі арганізацыямі”, -- гаворыць старшыня Беларускага аб`яднаньня студэнтаў Ілёна Карпюк.

БАС у Варшаве – гэта добра вядомыя ня толькі мясцовым беларусам канцэрты “Беларускі андэграўнд”, беларускія вечарыны, сустрэчы.

На пачатку 1980-х маладыя беларусы – ініцыятары стварэньня БАСу – былі захопленыя беларускай ідэяй, якая толькі пачынала па-сапраўднаму адраджацца на Беласточчыне, і на гэтай хвалі стварылі арганізацыю. Чым прыцягальны БАС для моладзі цяпер?

“Вядома, сёньняшняе грамадзтва можа запрапанаваць моладзі шмат розных спосабаў бавіць вольны час. Але мы пераконваем, што варта прызначыць свой час і на грамадзкую дзейнасьць”, -- гаворыць Ілёна Карпюк. .

Ілёна Карпюк кажа, што неўзабаве ў БАСе зьменіцца чарговае пакаленьне – да ўлады і актыўнай дзейнасьці ў арганізацыі прыйдуць новыя студэнты-беларусы. Плянаў шмат:

“Басовішча”, вядома, гэта прыярытэт, але будуць і іншыя канцэрты. Хочам выдаваць беларускія кнігі, а таксама паспрабаваць выдаваць музычныя альбомы. Бо гэта тое, што пакідае па нас нейкі сьлед”.

25-цігодзьдзе БАСу гэтымі днямі адзначаюць у Варшаве і Беластоку.