У Маскве сабралася амаль 200 вагонаў беларускага цукру :: Хартыя'97 :: Навiны

Расейскі затор ужо абыйшоўся беларускім вытворцам і чыгуначнікам у 600 тысяч даляраў. Цяперашні ўраджай цукровага бурака дазваляе Беларусі экспартаваць у Расею 426 тысяч тон цукру, а прададзена амаль за два месяца толькі 36 тысяч тон. У пройгрышы ўсе. Сотні чыгуначных вагонаў, загружаныя цукрам, прастойваюць з пачатку лістапада.

Цукровы затор ужо аднойчы стаў праблемай для пасажырскіх зносінаў паміж краінамі, паведамляе тэлеканал ОНТ. У ноч на 6 лістапада на станцыі Асінаўка цукровы эшалон перакрыў дарогу цягніку “Берасце – Масква”. Паводле раней дасягнутых дамоўленасцяў, увесь беларускі цукар павінен адпраўляцца на адзін мытны склад у Маскве. Парадак надгляду, які ўсталяваны на Траекураўскім пасту маскоўскай мытні, тармозіць працэс адгрузкі. Даглядаецца літэральна кожны мяшок. У выніку са 182 вагонаў, якія сабраліся ў Маскве, з 29 верасня дагледжаныя толькі 20. Беларусы ўжо былі вымушаныя вяртаць адзін з эшалонаў на радзіму.

На мінулым тыдні Аляксандр Лукашэнка і Уладзімір Пуцін дамовіліся ў Маскве аб здыманні бар`ераў, аднак сітуацыя цалкам не змянілася.

Як заявіў учора старшыня канцэрна “Белгоспищепром” Іван Данчанка, беларускі бок пакуль не мае намеру уводзіць стрэчныя санкцыі на ўвоз расейскіх тавараў і разлічвае на хуткае вырашэнне сітуаціі.