Сяргей Скрабец: «Казуліна могуць пачаць карміць сілком, а гэта – смерць» :: Хартыя'97 :: Навiны

Экс-кандыдат у прэзідэнты Беларусі, палітвязень Аляксандр Казулін 34 дні галадае ў віцебскай выпраўленчай калоніі. Па меркаванні былога палітвязня Сяргея Скрабца, які нядаўна выйшаў на волю з гэтай калоніі, не выключна, што ў самы блізкі час Аляксандра Казуліна могуць пачаць карміць сілком. “Магчыма, што па ўказцы “зверху” Аляксандра Казуліна пачнуць карміць сілком. Але гэтага ні ў якім разе нельга рабіць. Гэта смерць. Чалавека, які галадае такі доўгі тэрмін, неабходна змясціць у адмысловую рэанімацыйную палату і паступова, вельмі асцярожна, выводзіць з галадоўкі. З абавязковай згоды гэтага чалавека”, – заявіў Сяргей Скрабец у інтэрв’ю прэс-цэнтру Хартыі’97.

Па меркаванні Сяргея Скрабца, магчыма, гэта чыннік таго, што начальнік калоніі “Віцьба-3” Віталь Агністыкаў сыйшоў на адпачынак. “Ніхто не хоча адказваць, калі, крый Божа, з Казуліным нешта здарыцца”, – лічыць былы дэпутат.

У былога палітвязня мала веры да апошніх заяў кіраўніцтва калоніі, аб тым, што зараз Казулін важыць 73 кілаграмы, “бадзёры” і “усмяхаецца”.

“Я думаю, што Аляксандр Казулін зараз можа важыць кілаграмаў 70 і яго вага працягвае памяншацца. Кажуць, што ён выглядае “бадзёра” – гэта здзек. Здароўе чалавека сур’ёзна пагаршаецца, падае тэмпература цела, ціск... Проста дзіка ўсё гэта чуць. Пусціце да Казуліна адваката, незалежнага лекара, навошта ж вы яго хаваеце ад усіх?!” – абураецца Сяргей Скрабец.

Нагадаем, што экс-кандыдат у прэзідэнты Аляксандр Казулін галадае ў знак пратэсту супраць “існуючага ў Беларусі беззаконня” і патрабуе разглядзець сітуацыю ў Беларусі ў Радзе Бяспекі ААН.