Вінцук Вячорка: «Толькі масавымі вулічнымі акцыямі можна змяніць сітуацыю ў краіне» :: Хартыя'97 :: Навiны

Галоўная мэта ўдзелу дэмакратычных сіл у кампаніі “Мясцовыя выбары” – мабілізацыя людзей для вясновых акцый пратэсту апазіцыі. Аб гэтым 21 лістапада падчас прэс-канферэнцыі ў Менску заявіў лідэр Партыі БНФ Вінцук Вячорка. “Мы разумеем, што толькі масавымі вулічнымі акцыямі можна змяніць сітуацыю ў краіне, – сказаў палітык. – Для гэтага неабходна, каб да тых, хто выходзіў у сакавіку цяперашняга года на Кастрычніцкую плошчу пад палітычнымі лозунгамі, далучыліся тыя, хто незадаволены эканамічнай сітуацыяй у краіне”.

В.Вячорка паведаміў аб выніках рэгістрацыі ініцыятыўных груп па вылучэнні кандыдатаў у дэпутаты мясцовых Саветаў ад Партыі БНФ. У цяперашні час кампанію падтрымліваюць 132 чалавекі, у тым ліку і сам палітык. Ён нагадаў, што мясцовыя выбары апазіцыя таксама выкарыстоўвае для высоўвання дэлегатаў на Кангрэс дэмакратычных сіл. Для гэтага неабходна сабраць не менш за 300 подпісаў выбаршчыкаў за вылучэнне кандыдатам у дэпутаты альбо пад заклікам дэмакратычных сіл да беларускага народа. Партыя БНФ разлічвае высунуць на кангрэс каля 200 дэлегатаў і стварыць на ім адну з самых буйных фракцый.

Нажаль, канстатаваў палітык, з пачатку выбарчай кампаніі ўзмацніліся рэпрэсіі ў дачыненні партыйных актывістаў. У якасці прыкладу В.Вячорка прывёў звальненне са школы маладога педагога Іны Кебікавай, якая працавала настаўніцай ангельскай і беларускай мовы ў вёсцы Грыцэвічы Клецкага раёна Менскай вобласці. І.Кебікава 3 літспада прынесла ў раён заяву з просьбай вызваліць яе ад працы на тры дні ў сувязі з неабходнасцю рэгістрацыі ініцыятыўнай групы па вылучэнні яе кандыдатам у дэпутаты. Гэтая просьба не была здаволеная. Дзяўчыне прапанавалі адмовіцца ад намеру ўдзельнічаць у выбарах. Тым не менш І.Кебікава здала неабходныя дакументы ў выбарчую камісію, а праз тры дні пасля гэтага была звольненая з працы.

Акрамя таго, В.Вячорка паведаміў, што Партыя БНФ прайшла перарэгістрацыю ў Міністэрстве юстыцыі, якая праводзілася ў адпаведнасці з патрабаваннямі новай рэдакцыі закона “Аб палітычных партыях”. Па словах палітыка, юрыстам БНФ прыйшлося некалькі разоў дапрацоўваць статутныя дакументы, але ў канчатковым выніку Мінюст іх ухваліў.