Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Сваякі і паплечнікі Казуліна прыйдуць у дзень яго нараджэння да калоніі 13:46, 23/11/2006
Сваякі і палечнікі экс-кандыдата ў прэзідэнты, палітвязня Аляксандра Казуліна маюць намер перадаць палітыку 25 лістапада, у дзень яго нараджэння, кветкі, кнігі і лісты. Аб гэтым паведаміў БелаПАН юрыст выбарчага штаба экс-кандыдата Алег Воўчак.
“Мы разлічваем, што жонцы, дочкам, сябрам і паплечнікам па партыі дазволяць перадаць Казуліну кветкі, кнігі, лісты, паштоўкі ад яго паплечнікаў, – сказаў А.Воўчак. – Падтрымаем маральна, хоць праз плот, каб ён адчуў, што мы з ім. Жонка Казуліна, Ірына, ужо напісала яму, што мы прыйдзем у гэты дзень да калоніі”.
Па словах А.Воўчака, самае блізкае кароткатэрміновае спатканне з А.Казуліным магчыма толькі 17 лютага, а доўгатэрміновае – толькі пасля выхаду яго з галадоўкі.
Па дадзеных юрыста, скарга А.Казуліна, якая аспрэчвае правамернасць вынесенага яму судом Маскоўскага раёна Менска прысуду, будзе разгледжаная Менскім гарадскім судом да 1 снежня. “Ва ўсякім разе, мы разлічваем на пачатак снежня”, – сказаў А.Воўчак.
А.Казулін праводзіць бестэрміновую галадоўку з 20 кастрычніка ў калоніі “Віцьба-3”, дзе адбывае пакаранне. Ён пратэстуе супраць “існуючага ў краіне беззаконня”, а таксама спрабуе прыцягнуць увагу Рады Бяспекі ААН да сітуацыі ў Беларусі.
