Лукашэнка мае намер браць з Расеі па мільярду даляраў за год :: Хартыя'97 :: Навiны

Аляксандр Лукашэнка лічыць, што спагнанне цаны за транзіт расейскіх грузаў на Захад знівеліруе негатыўныя наступствы падвышэння цэнаў на газ. “Штогод праз Беларусь праходзіць 100 млн тон груза з Заходняй Еўропы ў Расею і назад. Калі па 10 даляраў за тону боаць – мільярд. І няма пытанняў з цаной на газ”, – заявіў Лукашэнка падчас прэс-канферэнцыі для ўкраінскіх журналістаў у Менску. Разам з гэтым ён нагадаў, што сёння “гэта бясплатна”. “Усе вайсковыя аб’екты – бясплатна”, – дадаў беларускі кіраўнік.

Разам з гэтым А.Лукашэнка падкрэсліў, што для расейца і ўкраінца няма ў Беларусі ніякіх абмежаванняў. “А Калінінград? А абарона? Мы стварылі групоўку на заходнім накірунку, асновай якой з`яўляецца беларускае войска. Як прызналі натаўскія эксперты – самае эфектыўнае на заходняй мяжы”, – працягваў А.Лукашэнка, падкрэсліўшы, што Беларусь “выгоды не шукае”.

Аляксандр Лукашэнка ўпэўнены ў немагчымасці будаваць “саюзныя адносіны” з Расеяй на нераўнапраўнай аснове.

Каментуючы сітуацыю з цаной на расейскі газ, кіраўнік дзяржавы адзначыў, што “для нас няма пытання: ці будзем мы з газам або не. Пытанне ў тым, колькі гэты газ будзе каштаваць”. Па меркаванні Лукашэнкі, “не важна, якая будзе цана – 50 або 120 даляраў (за 1 тыс. куб.м – ІФ), галоўнае, каб гэтая цана была аднолькавая (для расейскіх і беларускіх спажыўцоў – ІФ), каб былі роўныя ўмовы для беларускіх і расейскіх суб`ектаў гаспадарання”. “Калі кошты розныя, то аб якіх роўных умовах ідзе гаворка?!”, – задаў ён рытарычнае пытанне. Разам з гэтым А.Лукашэнка адзначыў, што “па мінулым годзе мы палічылі, што купляем расейскую нафту на 40 даляраў даражэй, чым Украіна ў Расеі”.

“Аб якім саюзе можа ісці гаворка ў такой сітуацыі?”, –спытаў Лукашэнка.

Ён нагадаў, што ў свой час падпісваў “дакументы з Барысам Ельцыным, для таго каб былі роўныя ўмовы для людзей, для суб`ектаў гаспадарання, фінансавых капіталаў”. Па яго словах, “калі розныя ўмовы, то адсюль выснова адназначная – гэта ўжо не адзіная дзяржава, якую мы замахнуліся пабудаваць”.

“Больш таго, Расея выходзіць з пагадненняў, якія мы падпісалі раней. Як гэта разумець? Будаваць саюзныя адносіны на нераўнапраўнай аснове не магчыма. Народ не ўспрыме гэтага, і такі саюз разваліцца на працягу некалькіх гадоў”, – рэзюмаваў А.Лукашэнка.